Iniciativa pol Asturianu demanda pa l’ALLA una partida presupuestaria asemeyada a la del añu pasáu

El recorte del 40 por cientu que sufre’l presupuestu de l’Academia de la Llingua Asturiana (ALLA) provocó les crítiques d’Iniciativa pol Asturianu. Esti coleutivu demanda pa l’ALLA una partida presupuestaria asemeyada a la del 2011.
 
Iniciativa pol Asturianu fala d’esti retayu como un “ataque grave” a la institución académica “nun contestu mui difícil pa la llingua d’Asturies, y teniendo en cuenta que l’ALLA ye una institución siempres austera y que yá hasta agora cuntaba con namás los fondos imprescindibles pal desenrrollu del so llabor”. Asina, según les cuentes feches pol Gobiernu tres la prórroga presupuestaria que va executase esti añu, al menos hasta que l’Executivu que salga de les urnes el 25-M presente otres cuentes, a l’ALLA corresponden-y 134.320 euros, cantidá mui lloñe de los 230.000 del 2011. Por esti motivu, el coleutivu de defensa del idioma pide que’l Gobiernu rectifique “esta partida del presupuestu prorrogáu pal 2012, calteniendo, polo menos, la cantidá establecida pal añu anterior, y nunca con rebaxes penriba de la media del restu de los retayos de presupuestu”.
 
D’igual forma, esta asociación quier aprovechar esti momentu pa recordar que l’ALLA ye la única de les academies esistentes de les llingües del Estáu que nun tienen financiación de Madrid. Según espón nuna nota Iniciativa pol Asturianu, la Real Academia de la Lengua Española recibe más de 4 millones d’euros al añu; l’Institut d’Estudis Catalans, casi un millón d’euros; Euskaltzaindia, mediu millón d’euros; y la Real Academia Galega, 200.000 euros. Asina, dende esti coleutivu reclamen al Gobiernu que qu’esixa al Executivu estatal “una partida pa l’ALLA nos presupuestos xenerales, pa finar con esta marxinación a la institución asturiana y ayudar a la financiación d’una institución imprescindible pa la normativización del idioma”.