Iniciativa pol Asturianu demanda a Celaá la creación de la especialidá docente enantes de les eleiciones

Tres votaciones unánimes na Xunta Xeneral y presencia nel programa de la mayoría de partíos, inclusive’l PSOE, sigue ensin crease la especialidá docente d’asturianu y gallego-asturiano. Iniciativa pol Asturianu pide a la ministra socialista Isabel Celaá que dea’l pasu enantes del elecciones estatales del 28 d'abril.

“Ye una cenciella cuestión de voluntá política y nun tien que tener vinculación cola oficialidá del idioma, sinón que namás supón cambiar el decretu d'especialidaes”, recuerda’l coleutivu que trabaya na normalización del idioma. “Nun ye esplicable que siendo una cuestión que xeneró yá delles votaciones unánimes de la Xunta Xeneral, y tando nel programa de cásique tolos partíos, nun se diera yá solución a esti problema que lleva xenerando dificultaes dende va más de trenta años”, añade.

Por ello, solicita a la ministra d’Educación y Formación Profesional que dea’l pasu y esixe al conseyeru Genaro Alonso una “intervención urxente” cola fin de “buscar una solución a esta decisión del ministeriu”, en referencia a la negativa que se-y dio al respeuto al Sindicatu Unitariu Autónomu de Trabayadores de la Enseñanza d’Asturies (SUATEA) en respuesta a una entruga per escrito. Na mesma, niégase la posibilidá de crear  la especialidá docente, dexando al profesoráu de Llingua Asturian y Gallego-asturiano en “peores condiciones de trabayu que los del restu de les llingües d’España y que los de cualesquier otra asignatura”, afirma Iniciativa pol Asturianu.