Iniciativa pol Asturianu acusa a Carreteres d’incumplir la toponimia oficial de Parres y Piloña

|

La carretera nueva que sirve d’enllaz a l’Autovía del Cantábricu (A-8) per Lieres incorpora cartelos con topónimos non oficiales de Parres y Piloña. Iniciativa pol Asturianu acusa d’esta situación a la Direición Xeneral de Carreteres.

Estos cartelos utilicen formes castellanes, yá nun oficiales nel país, como ‘Infiesto’ o ‘Arriondas’ en cuenta de les denominaciones tradicionales y d’usu obligáu pola Alministración, ‘L’Infiestu’ y ‘Les Arriondes’. “Ésti ye un nuevu ataque a la recuperación y normalización de la toponimia tradicional asturiana, y rescampla n'especial dempués de que la conseyera de Cultura reclamara al Ministeriu de Fomentu l'usu d'esta toponimia qu'agora vemos que nun cumple siempres el so propiu Gobiernu”, afirma nun comunicáu Iniciativa pol Asturianu.

El coleutivu que trabaya pa la normalización de la llingua asturiana unvió, por esti motivu, una carta a Carreteres nel que s’esixe la igua d’esti error, asina como a los alcaldes de Piloña y Parres, Carmen Barrera y Marcos Gutiérrez Escandón, de manera respeutiva, solicitando-yos que reclamen “l'usu de los nomes de llugar que ficieron oficiales los propios plenos de dambos conceyos”.

 

 

Contador Estadistiques