Iniciativa pol Asturianu acude a Gasteiz a un alcuentru de mozos falantes de llingües minorizaes

El llunes comenzó en Gasteiz el II Hizkuntza Gutxituetako Hiztun Gazteen (HIGA!), alcuentru de moces y mozos falantes de llingües minorizaes. Iniciativa pol Asturianu representa al nuesu idioma nesta cita, na que va proyeutase ‘La vida ensin oficialidá’.

Vitoria-Gasteizko Udalera y l’Euskal Herriko Unibertsitatea entamen estes xornaes incluyíes na programación del los cursos de branu qu’entama la instución universitaria. 70 representantes de llingües minorizaes de tol mundu participen dende ayeri y hasta’l xueves nelles y por parte asturiana desplazáronse a Euskadi Inaciu Galán y Iván Llera, presidente y vocal d’Iniciativa pol Asturianu, de manera respeutiva.

Dambos van participar en dellos talleres contando les esperiencies de la organización y la situación actual de la llingua asturiana. Tamién, a les 15.30 hores de güei, van presentar ‘La vida ensin oficialidá. Les consecuencies de la falta de drechos llingüísticos n’Asturies’, el documental que recueye dalgunos de los munchos casos de discriminación llingüística que se viven nel país, producíu a costafecha pal esitosu seminariu ‘Oficialidá, el camín constitucional pal futuru del asturianu’ celebráu n’iviernu n’Uviéu.

“Nesti monentu nel que se ta falando tanto de la oficialidá ye importante conocer esperiencies d’otres comunidaes llingüístiques que yá pasaron por procesos de normalización”, apuntó Galán sobre la presencia d’Iniciativa pol Asturianu en Gasteiz. D’igual forma, quier aprovechar la so asistencia al HIGA! pa siguir estrechando llazos d’amistá y collaboración con otres organizaciones que representen a llingües minorizaes de los cinco continentes.

Na semeya, un momentu de la charra del catalán Xavier Vila 'Algunes claus per entendre la política lingüística'.