Día del Llibru Asturianu

Iniciativa entrega a los partíos un documentu con 50 propuestes de cara a la negociación presupuestaria

|
Presupuestos 2019

Coincidiendo col entamu de la negociación pa la ellaboración de los Presupuestos, Iniciativa pol Asturianu ta acabante d’entregar a los partíos un documentu con mediu centenar de propuestes. Éstes abarquen delles estayes claves pa la normalización del idioma como ye’l sistema educativu, la RTPA o l’ámbitu empresarial y turísticu.

Ayeri'l coleutivu fixo llegar a los partíos el documentu “col envís d’aportar idees y reivindicar una mayor esmolición por midíes avanzaes de normalización nun contestu nel que los partíos que sofiten la oficialidá son mayoría nel parllamentu asturianu”. Inaciu Galán, vocal de Rellaciones Institucionales, púnxonse en contautu darréu colos voceros y voceres de les formaciones parllamentaries y vio una bona acoyida: “Plantegamos propuestes de distintu tipu, afondando na necesidá de que les midíes seyan tresversales a tol Gobiernu, con idees d’acciones pa toles conseyeríes y principales entes de l’alministración autonómica”.

La ellaboración d’un Plan de Normalización “tresversal a tol Gobiernu” ye la primera, con un aumentu del presupuestu pa Política Llingüística, pa l’ayuda a la creación y pa la robla de convenios que permitan afitar los servicios de normalización llingüística. El respetu a la toponimia, la creación de llinies d’ayudes pal etiquetaxe de productos, una cuota creciente de programación n’asturianu en RTPA, la creación del Grau de Filoloxía Asturiana, la formación del funcionariáu, bonificaciones fiscales a les empreses qu’usen l’idioma, promoción turística en llingua asturiana y de la lliteratura son dalgunes del mediu centenar de propuestes del documentu qu’Iniciativa pol Asturianu considera de fácil desendolcu.

Incorpora tamién una serie de puntos a negociar col Gobiernu estatal, como la inclusión de los escritores n’asturianu dientro de los Premios Nacionales de Literatura; una partida de los Presupuestos Xenerales del Estáu pa l’Academia de la Llingua Asturiana, como reciben el restu d’academies; y plena igualdá del asturianu coles demás llingües dientro de les polítiques de promoción llingüística.

Na semeya, llápiz de memoria colos Presupuestos d'esti añu.

Contador Estadistiques