Iniciativa busca en Bruxeles abrir víes nueves de trabayu pol idioma nes instituciones europees

Inaciu Galán, vocal d’Iniciativa pol Asturianu, desplazóse a Bruxeles p’abrir víes nueves de trabayu pol idioma nes instituciones europees. Na so visita aconceyó col eurodiputáu asturianu del PSOE, Jonás Fernández Álvarez, col que surdió la posibilidá d’entamar estos meses de presidencia española de la XE un eventu “col envís de dar a conocer meyor la situación d’una llingua como l’asturiana que sigue ensin l’estatus d’oficialidá”.

“Iniciativa pol Asturianu quier siguir abriendo caminos na reivinidación del asturianu y una de les cuestiones pendientes yera la europea”, esplicó a la vuelta de Bélxica’l periodista y escritor, que rescampló la bona sintonía de trabayu con Fernández Álvarez. “Foi una mui bona acoyida, incorporó munches idees mui interesantes al llabor que tamos intentando facer pol idioma”, esplicó.

La xunta col socialista’l vienres yera una parte importante del plan de ruta d’esta organización pa “reividincar l’asturianu; conocer qué caminos podemos llevar pa la interlocución col Parllamentu Européu y con otres instituciones europees, de tal manera que podamos poner na axenda política la cuestión del asturianu como llingua non oficial”. De la mesma salió la posibilidá de, “nos próximos meses, coincidiendo cola presidencia española de la XE, celebrar dalgún tipu d’eventu nes instalaciones del Parllamentu Européu en Bruxeles col envís de dar a conocer meyor la situación d’una llingua como l’asturiana que sigue ensin esi estatus d’oficialidá tan necesariu pal so desendolcu y pa la so tresmisión hacia’l futuru”.

Sería al traviés d’una xornada divulgativa centrada nel asturianu y n’otres llingües non oficiales. Otra manera, tamién se faló de la posibilidá d’algamar sofitu institucional con propuestes que defendan la diversidá llingüística.

“Les instituciones europees son tamién parte de la cadarma institucional d’Asturies, y como tales, han implicase na defensa y protección del asturianu. La Xunión Europea amosó siempres una importante sensibilidá pa cola diversidá llingüística y cultural, polo que tamos seguros de que ye un camín que podrá xenerar víes interesantes de trabayu pal idioma”, aseguró por último Galán.

Na semeya, Galán y Fernández Álvarez.