Inglaterra acepta'l galés

El gobiernu de Londres anunció güei que tolos sitios institucionales na internet del gobiernu del Reinu Xuníu que dean serviciu en Gales van tar disponibles tamién n'idioma galés. Hasta agora taben n'idioma galés les páxines de l'Asamblea Nacional de Gales, pero dende agora l'usu d'esti idioma va espardese a tolos sitios de l'alministración inglesa en Gales, emplegándose amás dominios billingües (n'inglés y en galés) pa identificar los sitios. La petición fíxola el Bwrdd yr Iaith un organismu semiindependiente y semioficial pero con financiación pública que sacó alantre esta interesante propuesta. En comparanza, sedría como si tolos webs d'alministraciones españoles que dean serviciu n'Asturies tuvieren disponibles en llingua asturiana, un futurible que nun tien muncha traza de facese realidá en viendo que namás una parte mínima de les mesmes alministraciones asturianes tienen el web n'asturianu.