Incontestable victoria nel campu y nes graes

Les graes del Tartiere que miren pa contra'l campu del Astur vivieron un ambiente impresionante que remató cola llegada de los xugadores que, tres d'imponese al A.C.F. a escasos 100 metros del Tartiere, visitaron el so campu p'agradece-y a l'afición l'apoyu que-yos prestó una vuelta más nel partíu d'ayeri. Comportamientu exemplar de l'afición uvieína y comportamientu impresentable'l de la directiva del A.C.F. que nun permitió la entrada al campu fútbol de los compañeros nes llabores informatives de Radio Sele. Talmente paez que-y manca a la directiva del ACF sentir delles voces y que contra la llibertá d'espresión nada meyor que la censura.

No deportivo, el Real Uviéu foi dafechamente superior a un ACF que nunca nun vio posible la victoria gracies en parte a la gran actuación de Darío, que con dos goles nel primer cuartu hora marcó'l restu'l partíu. Diben solo 3 minutos de partíu cuando Darío entamó a facer patente'l so gran momentu xuegu y efeutividá. Borxa mandó un balón en llargo, el central del ACF escurrióse y el balón llegó-y a los pies al delanteru azul que con una vaselina perfecta llograba'l 0-1. Pocos minutos más tarde, Michu mandaba un gran pase pel centru que Darío convertió na segunda vaselina y nel segundu gol de la tarde cuando solo diben 16 minutos de xuegu.

Na segunda parte l'Uviéu quixo xugar cola ventaxa consiguida nos primeros 45 minutos, l'equipu azul baxó un poco'l ritmu y tiróse p'atrás. Como consecuencia d'ésto vino´l gol del A.C.F., foi nel minutu 26 nun fallu de Roberto que nun foi a despexar una falta y Pereda fizo'l 1-2. Rivas movió'l bancu y acertó. Rubén y Cervero entraron por Xandru y Darío, l'Uviéu volvió a controlar el balón y los minutos foron pasando, pero faltaba'l gol de Cervero. El delanteru marcó'l so novenu gol nun gran remate de cabeza a centru de Nacho Fradejas, alzóse nel área y consiguió un remate axustáu al palu que foi imparable pa Xuan. Yera'l minutu 89 y d'ehí al final a disfrutar nel Tartiere onde volvió a facese la fola y too, fiesta uvieína que se consumó cola llegada de los xugadores al Tartiere.

A la fin, victoria azul que xunto cola derrota del Mosconia en Grau col Ribesella, sirve pa consolidar nel lideralgu al equipu d'Antonio Rivas y que dexa claro'l gran momentu de forma pel que tán atravesando Darío y Cervero, 25 goles ente los dos, 16 pal Pichichi de la categoría y 9 pal ídolu de l'afición que sabe rentabilizar con goles los minutos de los que disfruta.