Inciativa pol Asturianu solicita l’emplegu del términu Antroxu n’Uviéu en cuenta de 'Carnaval'

|

Queden ocho díes pal aniciu de los festexos previos a la Cuaresma, esto ye, l’Antroxu, y los conceyos yá anuncien esta celebración. Sicasí, n’Uviéu usen el términu castellanu 'Carnaval', lo que lleva a Iniciativa a pidir l’usu del tradicional.

Les dos ciudaes con más tradición nel formatu modernu d’estos festexos tres el franquismu, Xixón y Avilés, usen el términu Antroxu nestes fiestes qu’esti añu caen del 7 al 12 de febreru, anque non tolos conceyos faen lo mesmo. “Dende Iniciativa pol Asturianu queremos valorar positivamente l'usu del términu tradicional d'Antroxu que faen dalgunos conceyos d'Asturies”, anque recuerda qu’en munchos casos “suel arrenunciase a emplegar l'idioma d'una manera normal en tola información –programación, feches, regles de los concursos...– o mesmamente úsase únicamente'l castellán, escaeciendo y arrequexando'l nuesu patrimoniu llingüísticu”.

Esti ye’l casu d’Uviéu, onde amás de celebrar esta fiesta fuera de les feches tradicionales, los díes 15 y 16 de febreru, en plena Cuaresma –lo que fai que la folixa pierda en gran parte’l so sentíu–, utilicen el términu ‘Carnaval’ pa promocionala. “L'asturianu sigue siendo víctima d'una Casa Conceyu que representa a la segunda mayor población d'Asturies y que nun fai nada por respetar la Llei d'Usu y por da-y puxu al idioma dende les instituciones”, denuncien dende esti coleutivu, que tamién crítica que la imaxe corporativa de la ciudá tome como referencia una ‘O’, nun teniendo en cuenta’l topónimu tradicional Uviéu, tovía nun oficial. Otra manera, hai que recordar que nel 2010 sí s’utilizó’l términu Antroxu pa estes fiestes, lo que quedó en dalgo aneudóticu al recuperar ‘Carnaval’ l’añu siguiente.

“Dende Iniciativa pol Asturianu vamos esixir a los responsables d'esti conceyu qu'igüen esta llaceria y qu'adquieran el compromisu de dar pasos nuevos nel usu del idioma asturianu. Amás, pidimos a ciudadanos d'otros conceyos que se pongan en contautu con nós p'asoleyar otres situaciones paecíes y poder presentar les quexes oportunes”, destaquen nun comunicáu.

 

AdxuntuTamañu
Image icon Cartelu 'Carnaval Oviedo 13'.jpg61.66 KB
Contador Estadistiques