Inauguróse'l Muséu del Xurásicu

El Presidente del Principáu d'Asturies, Vicente Alvarez Areces, inauguró ayeri en Colunga'l Muséu del Xurásicu d'Asturies, una instalación que los sos responsables científicos definen como "referencia" nel mundu científicu. El Muséu presenta venti reproducciones de dinosaurios a tamañu real, rescamplando ente elles la que representa a dos dinosaurios apareándose y atecha la colección de güelgues de dinosauriu más grande d'Europa.

Con una inversión de 12 millones d'euros, el Muséu del Xurásicu tien una superficie espositiva de más de 5000 metros cuadraos y métese na carrera por ser el muséu con más visites d'Asturies, un puestu qu'agora ocupa'l Muséu de la Minería, que tolos años recibe una media penriba de los 80.000 visitantes, cifra a la que s'allega tamién el Muséu del Ferrocarril de Xixón. De mano, la entrada individual va ser más cara que nestos dos museos. Cinco euros por persona contra los 3,10 del MUMI o los 2,17 del del Ferrocarril, anque va haber descuentu pa grupos.

El Presidente asturianu Vicente Álvarez Areces declaró que'l del xurásicu ye'l primeru d'una riestra d'equipamientos culturales que van abrir d'equí a pocos años, ente los que destacó'l Parque de la Prehistoria de Teberga, que va abrir nel 2.006. Xunta ellos, el Plan d'usos y remocique de la Universidá Llaboral de Xixón, los proyectos arreyaos al Prerrománicu asturianu, el Parque Históricu del Navia y los equipamientos nuevos nel Muséu de la Minería

Otramiente, el discursu d'Areces destacó munchó'l papel turísticu del muséu acabante inaugurar, rellacionándolu como un elementu más na ordenación del turismu nel oriente asturianu dientro d'un plan pa menguar la masificación na parte de los Picos d'Europa.

El muséu tampoco nun naz ensin polémica. D'una parte, el Principáu dio anuncia al traviés del BOPA de que la instalación diba xestionala directamente la Sociedá Rexonal de Turismu hasta que se decidan los sos órganos de gobiernu "por razones d'eficiencia" Xunta ello, la decisión de nun poner al frente del muséu a un científicu nun sentó bien n'ámbitos académicos, sobremanera na facultá de Xeoloxía. La solución definitiva sobre la xestión del Muséu va conocese a primeros del añu qu'entra.