Iñarritu entruga al Gobiernu estatal pola ausencia del asturianu na atención del 016

|
Jon Iñarritu

El diputáu d'EH Bildu treslladó per escrito la cuestión a la ministra Irene Montero.

El teléfonu 016 atiende a les víctimes de violencia de xéneru en 52 idiomes, tolos oficiales del Estáu y otros mayoritarios y minoritarios de tol mundu al traviés d'un serviciu de teletraducción. Ente ellos nun ta l'asturianu, lo que denuncia Andecha Astur.

El so sociu na coalición Agora Repúbliques, EH Bildu, treslladó a la responsable del Ministeriu d'Igualdá una entruga al respeuto al traviés del diputáu Jon Iñarritu: '¿Qué iniciatives camienta tomar el ministeriu pa respetar dafechu los drechos de les muyeres maltrataes d’Asturies permitiendo-yos alcontrar proteición al traviés del teléfonu 016 ensin ver entá más dañaos la so dignidá y drechos por espresase en llingua asturiana y pa que nun seyan peor trataes polos servicios d’esi ministeriu que les muyeres falantes de soninké, wolof o mandinca?'. "La entruga ye una forma de denunciar un pasu más na represión llingüística que carez Asturies, esta vegada direutamente dende un ministeriu xestionáu por Podemos", espliquen dende la formación nacionalista asturiana.

Na semeya, Iñarritu promete'l so cargu como diputáu nel Congresu.

Contador Estadistiques