Iñaki Sánchez Santianes ganó en Lorient

El prestixosu troféu de gaita Mc Grimmonn (antiguu Macallan) una de les competiciones más intenses de les que se celebren nel marcu del Festival Intercélticu de Lorient, quedó otru añu más n'Asturies, nesta ocasión gracies al gaiteru Iñaki Sánchez Santianes. Rubén Alba completó'l trunfu asturianu col so segundu puestu, mientres que la tercer plaza foi pal gaiteru gallegu Agustín Sánchez. Nel concursu participaben anguaño cuatro intérpretes asturianos, cuatro gallegos y una gaitera bretona bien conocida pol públicu asturianu, Marie le Cam.

Esta competición acutada a gaiteros asturianos y gallegos -el concursu de gaita escocesa celébrase aparte- representa cada añu una llucha bien dura ente gaiteros d'una parte y otra de la ría del Eo na qu'anguaño triunfaron, con muncho, los asturianos. El concursu foi una reivindicación pal gaiteru uvieín, que l'añu pasáu raspiare'l trunfu nel Mac Grimmon col so tercer puestu nuna edición na que la victoria foi tamién p'Asturies na persona d'Ángel Domingo.

Iñaki Santianes ye un vieyu conocíu ente los gaiteros y gaiteres d'Asturies, con años d'esperiencia como gaiteru solista o acompañando a la banda de gaites "Ciudad de Oviedo", un llabor que-y dio a Iñaki la esperiencia y la seguridá pa ganar nuna ocasión el "Concurso y muestra de folclore ciudad de Oviedo" nel apartáu de pareyes de gaita y tambor, quedar segundu nel Memorial Remis Ovalle, y entamar la so bandina "Cotcoricó". Esti añu 2005 Iñaki Santianes asoleyó'l so primer discu "Foncalada".