III Xermandía Celta de Corvera

La Xermandía Celta ye una perbona iniciativa del Conceyu de Corvera, na que s'axunten delles propuestes musicales que van dende les bandes de gaites y los grupos de baille hasta los grupos de rock.

El programa arranca yá mañana cola actuación a partir de les 22:00 hores de la bandina "La Llosa" y el monologuista Pin de la Cotolla. El vienres hai una nueche de rock con con 8 grupos nin más nin menos. "Nexxo", "Three Word Name" y "Distorsion Pro" d'Avilés, "Dixebra" y "IV Conexion" de la mesma Corvera, "Exkalibur" de L.luarca, "Güerku" de Candás y p'acabar "Krudillow" dende Valladolid.

El sábadu ta acutáu pa la música folk. Dende a les 22:00 van actuar la bandina "La Llosa", que repite actuación na Xermandía pa siguir tres d'ellos el grupu xixonés de Mento Hevia "Gueta na Fonte". L'aportación foriata de la nueche va venir de la mano de los orensanos "Ergon", y pa da-y el remate a la nueche, la xente de"Corquiéu".

El domingu ye'l día de les bandes de gaites, con un desfile a les 18:00 hores y un conciertu nel centru cultural del "Llar" a les 19:00 hores. Amás de too esto, los díes 18 y 19 va haber mercadín nocturnu, grupos de baille, bandes de gaites, malabaristes y conciertos espardíos per Cancienes, Les Vegues y Tresona. El sitiu escoyíu pa les más de les actuaciones, quitando les actividaes de Cancienes y Tresona, ye la esplanada "Tomás y Valiente" de Les Vegues.

Pa saber de más actividaes culturales n'Asturies convidámosvos a visitar la nuestra guia d'ociu.