Nava va centrar l’actividá musical d’esta fin de selmana. La villa acueye dende esti vienres les II Xornaes de Música Tradicional, na que destaca la Nueche Folk del sábadu con Cerezal, Felpeyu y la banda bretona Alambig Elektrik.
A les 17 hores los xuegos tradicionales van abrir na plaza Dominganes estes trés xornaes dedicaes a la música tradicional, que se van presentar de manera oficial a les 18 hores nel Muséu de la Sidra. Darréu, va principiar la mesa redonda ‘La gaita asturiana: nuevos repertorios pal sieglu XXI’, nel que van participar Juan Carlos Casimiro, xefe del departamentu de composición del Conservatoriu Profesional de Música de Xixón; Pedro Pangua, maestru gaiteru; Llorián García, musicólogu y gaiteru; y Jesús Ángel Rodríguez Solís, artesanu gaiteru. Modera l’actu, Rodrigo Fernández Joglar, profesor de gaita de la Escuela Municipal de Música de Nava y coordinador de les xornaes.
El programa del sábadu va principiar a les 11 hores na Casa Cultura Marta Portal cola presentación del llibru ‘Alborada II. Métodu de gaita asturiana’ de Flavio Benito, a lo que va siguir, al meudía, la charra ‘La música tradicional de Bretaña’ y una clase maxistral de guitarra folk a cargu de Roland Conq, miembru del grupo bretón Alambig Elektrik, actividá ésta última que va tener un preciu de 5 euros.
Festival de bandes de gaites y Nueche Folk
La plaza Manuel Uría va convertise pela tarde na sede del restu d’eventos previstos nes II Xornaes de Música Tradicional. Asina, a les 16 hores va principiar el II Alcuentru de Luthiers d’Instrumentos Tradicionales Villa de la Sidra, que per dos díes va axuntar en Nava a constructores procedentes de dellos puntos de la Península Ibérica. A les 17 hores va actuar el grupu folclóricu La Flor del Pumar, pa depués dar pasu al II Festival de Bandes de Gaites LaKadarma, nel que van participar la banda de gaites naveta xunto con Xácara, Candás y el grupu de percusión portugués Tocándar. Pa zarrar la xornada, Cerezal, Felpeyu y Alambig Elektrik van protagonizar la Nueche Folk dende les 22.30 hores. La banda bretona ye una de les formaciones de referencia en Breizh cola so propuesta de música de base tradicional con toques de hip-hop, funky o hardcore.
L’orixinal eventu festivu en clave d’humar pa gaita y percusiones, el II Concursu LaKadarmada, va centrar l’actividá del domingu a les 12.30 hores na plaza Manuel Uría. Ésti sigue los pasos d’otros asemeyaos que se celebren en dellos festivales intercélticos, como’l d’An Oriant, y nél el públicu ye’l que decide’l ganador. Media hora enantes, y hasta les 15 hores, va tener llugar la segunda xornada del II Alcuentru de Luthiers d’Instrumentos Tradicionales Villa de la Sidra.
Adxuntu | Tamañu |
---|---|
![]() | 49.47 KB |