Iglesias pide amestase al debate ente Areces y Ovidio Sánchez

El coordinador Xeneral d'IX d'Asturies, Jesús Iglesias, declaró ayeri que dexar fuera a la coalición IX-BA-Verdes fuera d'un hipotéticu debate electoral ente candidatos sedría daqué "antidemocrático". Iglesias retrucó asina a la posibilidá d'un debate televisáu ente los candidatos socialista y popular, Álvarez Areces y Ovidio Sánchez asegurando que n'Asturies la política ye "cosa de trés" y declarándose convencíu de que la so fuerza política va ser la llave del gobiernu asturianu y de bien de conceyos.

Iglesias fexo estes declaraciones con motivu de la presentación llegal énte l'autoridá electoral de la coalición IX-Bloque por Asturies - Verdes. El políticu esplicó que'l programa de la coalición va ufiertar soluciones "interesantes" pa da-yos rempuesta a los problemes del empleu y la vivienda y pa la creación de servicios públicos de calidá nun marcu de crecimientu sostenible. Tocante a les candidatures a los conceyos d'Uviéu y otres como Samartín del Rei Aurelio, onde la crisis interna d'IX y los problemes p'aceptar a los socios de la coalición nestes elecciones nun dexen claro como van iguase les llistes nes elecciones a conceyos, Iglesias aseguró que van tar "dientro de mui poco".