Iglesias diz que los recortes al asturianu desmienten la vocación rexonalista de FAC

Jesús Iglesias criticó los recortes al asturianu de FAC lo que, na so opinión, desmiente la vocación rexonalista d’esi partíu. Tamién señaló que’l PSOE denegó a IX Cultura porque “desconfiaben” d’ellos “nel ámbitu de la cultura asturiana”.
 
El candidatu a la presidencia d’Izquierda Xunida (IX) fixo güei referencia a los recortes de fondos públicos destinaos a l’Academia de la Llingua Asturiana por parte del Gobierno nuna rueda de prensa na que tuvo acompañáu de la diputada Emilia Vázquez. Na so opinión, estos retayos desmienten la pretendida vocación rexonalista de FAC y el so supuestu compromisu cola cultura del país. D’igual forma, acusó al presidente Francisco Álvarez-Cascos de tomar como "rehén" a la sociedá n’aspeutos tán importantes como la cultura, el bienestar social y el deporte, en "una agresión esin precedentes qu’intenta convertir a los asturianos nos prisioneros d’una guerra que Foro declaró al restu de fuerces".
 
Nesi sen, fixo un llamamientu al eleutoráu pa que "tome nota" y el 25 de marzu próximu voten "un gobiernu respetuosu cola sociedá asturiana" pa poder aprobar el presupuestu del 2012 y solucionar problemes xeneraos "a posta" utilizando "un sistema de catástrofe" como "arma de presión política". Frente a esta postura, el voceru d’IX comprometióse a que la coalición va siguir defendiendo la oficialidá de la llingua con intensidá y afirmó que va trabayar pa que se reconoza la especialidá d’asturianu pa los profesionales de la enseñanza y pa que l’idioma tenga una mayor presencia nos medios de comunicación. Amás, comentó que’l PSOE denegó a IX la Conseyería de Cultura, nel alcuerdu de gobiernu últimu ente les dos formaciones, porque "desconfiaben” d’ellos “nel ámbitu de la cultura asturiana".