“‘Ida y vuelta’ ye un discu de gaita mui diferente”, rellata Carlos Casado

|
“‘Ida y vuelta’ ye un discu de gaita mui diferente”, rellata Carlos Casado

Slum Suit, banda nacida en New York encabezada pol gaiteru Carlos Casado, sigue’l so proyeutu n’Asturies con músicos del país y cola xaponesa Kurumi Shinoara. Ta acabante d’asoleyar ‘Ida y vuelta’, el so segundu EP, “un discu de gaita mui diferente”.

“Ye menos jazz que l’anterior, distintu pero con cinco temes que siguen una mesma llinia”, esplica Casado, que define’l proyeutu de Slum Suit como “fusión folk y música del mundu”. Y ye qu’esta formación, que nel 2017 grabara’l so primer EP, homónimu, contó dende los sos anicios con integrantes de Xapón, Brasil, Turquía, Israel, Estaos Xuníos o Catalunya.

Hai dalgo más d’un añu Casado tornó a Asturies xunto cola so compañera, Shinoara, clarinete del grupu, dalgo que nun-y impidió siguir col proyeutu, pa lo que sumó a veteranos músicos de la escena asturiana. “Tuvimos suerte, porque too foi mui fácil. Coincidimos con Daniel Lombas –ex integrante de grupos como Llan de Cubel–, que taba comenzando con una banda con xente de Llangres y otres formaciones, y paeciónos un proyeutu interesante”, cuenta’l gaiteru.

El resultáu d’esta xuntanza musical ye ‘Ida y vuelta’, con cuatro temes grabaos en TUTU y otru, ‘Sicasí’ (しかし)’, que caltién el nome en xaponés “porque significa xusto lo mesmo nos dos idiomes”, en New York cola formación antigua. Toos ellos son instrumentales, a esceición de ‘L’espeyu’, con lletra de Pablo Texón al que-y pon voz Shinoara, siendo’l primer tema cantáu de la historia de Slum Suit.

L’EP presentóse’l pasáu 24 de mayu nel Teatru Toreno de Cangas del Narcea, con un conciertu “nel que lo pasamos xenial y nel que la xente disfrutó”, que contó cola presencia de la Banda Gaitas Cangas del Narcea, el grupu folclóricu Perendengue y el grupu de teatru El Carmen. Nos meses próximos, Slum Suit cuenta con facer una presentación nel centru del país y entamar delles actuaciones cola formación actual, compuesta por Casado, Shinoara, Óscar Santos (baxu), David Amores (flauta), Ángel Acebal (guitarra), Juan Villamil (batería) y Lombas (bodhrán).

‘Rumba’

Pa dar a conocer ‘Ida y vuelta’, discu que cuenta con diseñu de portada a cargu del caligrafista xaponés Taisan Tanaka, Slum Suit asoleyó tamién un videoclip del tema ‘Rumba’. Ésti ta fechu por La Polar Audiovisual y grabáu nos propios TUTU Estudios.

AdxuntuTamañu
Image icon Cubierta 'Ida y vuelta' de Slum Suit332.01 KB
Contador Estadistiques