Ibarretexe salió Lehendakari con dos votos d’EHAK

El Partíu Comunista de les Tierres Vasques (EHAK) dio-y al candidatu del PNV Juan José Ibarretxe los dos votos que precisaba pa ser Lehendakari del Gobiernu Vascu.

A la fin el Partíu Comunista de les Tierres Vasques (EHAK) entornó l'allancada situación nel Parlamentu vascu, onde dos candidatos se presentaben a la presidencia ensin tener la mayoría de votos precisa pa ello. D'una parte, el socialista Patxi López, que contaba, ente'l so grupu y el del PP, que-y diere'l so sofitu, con 33 votos, y d'otra, el candidatu del Partíu Nacionalista Vascu, el hasta agora Lehendakari Juan José Ibarretxe, qu'a la fin va repetir nel cargu gracies a los dos votos que-y dio EHAK, grupu que cuenta con nueve representantes na cámara, na sesión d'investidura d'esta mañana.

El sofitu d'EHAK nun podía facer a Ibarretxe Lehendakari na primer vuelta, na que se pidía mayoría absoluta, pero si que-y valió na segunda, onde val cola mayoría cenciella. Los representantes d'EHAK, formación que representa l'espaciu políticu de la izquierda abertzale, xustificaron el sofitu de mínimos que-y van dar a Ibarretxe por una cuestión de "responsabilidá" anque ello nun quitó pa que lu criticaren, llegando a llamalu "despreciable" nel debate d'investidura. El PNV va caltener asina'l gobiernu vascu otra llexislatura más colos votos de Eusko Alkartasuna, Ezker Batua y EHAK, pero nun contó col sofitu del escañu d'Aralar, la otra formación de la izquierda nacionalista vasca.

Más información na prensa vasca:
El Correo
Gara
Deia