IAS tresllada a distintes fuerces asturianes la so propuesta d'alternativa electoral pal 2007

El partíu políticu Izquierda Asturiana (IAS) emitió un comunicáu nel qu'esplica que ta llevando alantre reuniones con estremaes fuerces del nacionalismu y l'ecoloxismu políticu con vistes a iguar un alcuerdu electoral pal 2007. Andecha Astur, Los Verdes d'Asturies y grupos asturianistes locales son les fuerces coles que yá s'entrevistó IAS nes últimes selmanes, amás de grupos d'independientes, too col finxu de consiguir un alcuerdu "d'izquierdes, ecoloxista y asturianista" acordies col mandáu de la Dirección Nacional del partíu, que decidió llevar alantre "una alternativa unitaria pa les elecciones a conceyos y autonómiques de 2007".

Izquierda Asturiana (IAS) diz que "la candidatura tendría´d'ufiertá-y a la sociedá asturiana una alternativa electoral d'izquierdes, ecoloxista y asturianista que represente una rempuesta con posibilidaes electorales al actual allancamientu y estáu de coses al que nos llevó'l gobiernu de coalición de PSOE y IX-BA. IAS afirma tamién que "les polítiques propuestes pol PP y otres fuerces conservadores nun diben ser más qu'un agravamientu de la situación".

El marcu de negociación que ta treslladando IAS parte de trés exes, el primeru d'ellos la negociación d'un programa electoral común, en clave d'izquierda, asturianista y ecoloxista. El segundu pasa pela busca d'un nome común pa la candidatura que sía integrador y que permita que s'enarten nel alcuerdu grupos locales y independientes, mientres que'l terceru consiste na elección d'un cabeza de llista consensuáu que represente los valores de la posible coalición.