IAS acusa a Areces d’afitase nel discursu de la “lleenda urbana”

Mientres que pal gobiernu gallegu la emigración de xente mozo con preparación considérase una "lacra", el presidente Areces diz que ye dalgo normal "nuna Europa onde se fomenta la movilidá "una valoración que mereció la crítica más aceda de la formación nacionalista d'izquierdes Izquierda Asturiana.

Les últimes declaraciones del presidente asturianu Vicente Álvarez Areces sobre la emigración de mocedá asturiana merecieron la condena d'Ignaciu Llope, portavoz d'IAS, que llamentó'l contraste ente'l gobiernu asturianu, que calificó de "meru xestor d'una debacle económica y social" y el gobiernu gallegu, del que dixo "que tien visión de país y nun intenta xustificar lo inxustificable".

Ello ye que pa Llope, les declaraciones d'Areces, al qu'acusó d'asitiase nel discursu de la "lleenda urbana" sobre la emigración de la mocedá, han ponese en rellación coles que facía hai unes selmanes el Conseyeru d'Industria, Graciano Torre, que calificó a les decenes de miles d'asturianos que tolos años dexen el país pa trabayar fuera, como la demostración de qu'esisten n'Asturies "mozos con una mentalidá dinámica", ello mientres que'lsecretariu xeneral d'emigración gallegu, Manuel Luis Rodríguez afirmaba que "Galicia ta dexando marchar activos mui importantes" dalgo que calificó como "una gran lacra pal desarrollu de Galicia".

Pal portavoz d'IAS "la mera comparanza de les declaraciones pon na so xusta midida la visión de país, de condiciones llaborales, de bienestar y de serviciu a la ciudadanía que tienen los políticos asturianos, y en concretu'l presidente Areces, en comparanza colos gallegos" polo que pidió un "cambéu radical" nel discursu y na política económica asturiana sobre esti particular, un pidimientu qu'afitaba col datu de que l'añu pasáu les cifres de la emigración asturiana llegaron a les 30.000 persones.