HUNOSA tien previsto crear 900 empleos en sectores alternativos a la minería

La empresa HUNOSA va poner en marcha un Plan de Diversificación y de Reactivación Industrial col que pretende crear alredor de 900 empleos. Esti plan ye consecuencia del alcuerdu robláu ayer na sé de la SEPI ente la empresa minera y los sindicatos CC.OO y SOMA-FIA-UXT.

El Plan de Diversificación contempla l'aprovechamientu de les capacidaes y esperiencia d'HUNOSA pal desarrollu de proyectos d'investigación y promoción de nuevos negocios dientro de la propia empresa, pero non venceyaos a l'actividá minera. Asimesmo la empresa comprometese a desarrollar iniciatives rellacionaes cola so actividá tradicional como l'aprovechamientu forestal y de los recursos hídricos, la captura de CO2 y l'aprovechamientu del metanu de les capes de carbón, asina como les actividaes na estaya enerxética.

No que cinca al Plan de Reactivación Industrial les sociedaes Sadim Inversiones y Sodeco van dotase d'una capitalización de 17,5 millones d'euros aportaos pola SEPI y la empresa minera, colos que s'espera captar inversiones por importe de 150 millones d'euros. HUNOSA va facer un catálogu de sectores d'actuación preferente pala captación d'inversiones ente los que s'alcuentren l'enerxéticu, el medioambiental, les tecnoloxíes de la información y la comunicación, el biotecnolóxicu o'l químicu.