Humala supera a la conservadora Keiko Fujimori na segunda vuelta de les eleiciones de Perú

Ollanta Humala ganó les eleiciones de Perú col sofitu de la izquierda del país andín. L’ex comandante sumó, col 86,59 por cientu de los votos rexistraos, un 51,18 por cientu d’apoyos frente al 48,81 por cientu de la conservadora Keiko Fujimori.
 
El llíder del Partido Nacionalista Peruano presentóse a les eleiciones baxo l’alianza Gana Perú formada por dellos partíos d’izquierda como el Partido Comunista de Perú o’l Partido Socialista, ente otros, anque Humala nun se declara nin de dereches nin d’izquierdes, sinón nacionalista. Enfrente tuvo a la conservadora Keiko Fujimori, fía del ex mandatariu peruanu Alberto Fujimori, condenáu a 25 años de cárcel por violaciones de derechos humanos y a 7 y medio más por apropiación de fondos. Humala yá superara a Keiko, llíder del partíu Fuerza 2011, na primer vuelta celebrada n’abril al sumar un 31,7 por cientu de los votos pol 23,5 por cientu de la derechista. D’esta forma, el ex militar va sustituyir a Alan García, del Partido Aprista Peruano, como presidente de Perú.
 
Tres conocer los resultaos provisionales, Humala prometió una economía abierta y de mercáu y un gobiernu qu’incluya a los meyores cuadros téunicos independientes y intelectuales, “de concertación” y de “base ancha”. “Vamos promover más inversiones, vamos a llevar una economía de mercáu que ye la consolidación, el fortalecimientu del mercáu interno”, informó’l nacionalista na so intervención ante los miles simpatizantes de Gana Perú, la so plataforma eleutoral, concentraos na plaza Dos de Mayo de Lima, según declaraciones recoyíes pola axencia de noticies oficial Andina.
 
“Ganamos les eleiciones nacionales nel Perú y vamos instaurar un gobiernu de concertación nacional (...). Llogróse gracies al trabaya de caún de vustedes. La gran tresformación que güei llega a Palacio de Gobierno ye’l productu del trabayu de millones de peruanos que llucharon por defender la democracia y los sos valores”, indicó. Humala aprovechó amás pa reiterar que nun tien nengún compromisu col presidente venezolano Hugo Chávez, namái col pueblu peruanu. “Nun tengo compromiso dalgún con nengún grupu económicu (...). No diré a nengún lláu; voi quedame nel país con toos vustedes pa trabayar para xenerar oportunidaes pa toos”, dixo.
 
Hai que destacar que’l presidente nuevu de Perú, gran admirador de Lula da Silva, rodeóse nesta campaña de los asesores del ex mandatariu brasileñu. Humala firmó l’acta del ‘Acuerdo Nacional’ peruanu, foru creáu nel mandatu d’Alejandro Toledo pa garantizar les llibertaes civiles, y unvió una carta al pueblu na que prometía mantener la economía de mercáu y la propiedá privada, al igual que fixo Lula nel so día, col oxetivu de vencer les duldes que pudieren tener los empresarios del país andín cola so persona y la so alianza eleutoral qu’integra a la izquierda de Perú.