Homenaxe a Andrés Solar en Deva

La Xunta pola Defensa de la Llingua Asturiana va facer a les siete d'esta tarde un homenaxe a la figura del escritor Andrés Solar. L'actu va facese nel cementeriu de la parroquia de Deva onde ta enterráu l'escritor, esponente de la primer xeneración del "surdimientu" que morrió n'accidente de tráficu va güei venti años. Andrés Solar foi l'escritor al que se-y dedicó tamién esti añu la Selmana de les Lletres Asturianes

La Xunta Pola Defensa de la Llingua sorraya que l'escritor xixonés "dexó bien claro'l so compromisu pa cola so llingua, non solo cola so producción lliteraria, sinón amosando tamién una militancia activa na defensa de los derechos llingüísticos de los falantes de llingua asturiana y militando na Xunta pola Defensa de la Llingua Asturiana dende la so fundación".

Según el comunicáu "Venti años depués la figura d'Andrés Solar sigue siendo un referente pa tolos militantes de la Xunta pola Defensa de la Llingua Asturiana" Dende la so desapaición, la Xunta pola Defensa de la Llingua Asturiana entamó los Premios Andrés Solar como forma de mantener vivu'l so recuerdu. La Xunta adelanta qu'esta selmana van facese públicos los ganadores de los premios Andrés Solar 2004, que van entregase'l 28 de xineru nel Teatru Xovellanos de Xixón a les 20:00 hores nun actu solemne

Andrés Solar Santurio naciere nel Fondón de Deva, en Xixón nel añu 1955. Fíu de campesinos, en 1978 entró en Conceyu Bable, desenvolviendo una actividá lliteraria na que toca la prosa y la poesía, ganando dellos premios cola so obra como'l II Concursu de Narraciones Curties de la Diputación (ex aequo con Miguel Solís Santos) col relatu "Xuan y Xuanín".