Hip Hop, más allá de la rima n'Asturies

El mundu del Hip Hop ta acutando un espaciu propiu n'Asturies.
Munches zones, barrios y grupos sociales d'Asturies paecen un caldu de cultivu
perfectu pa esti movimientu. N'Asturies.com vamos echá-y una güeyada
a como ta manifestándose esta cultura musical na nuestra tierra.



El Hip Hop nun ye solo una moda, y nel casu del Hip Hop
n'Asturies yá podemos falar d'un movimientu que ta creando los sos
espacios, y lo que ye más importante, les sos formes autoctones
d'espresase. Esta música ñació nos Estaos Uníos nos años setenta como
un batulaxe de cultures musicales nos barrios de les grandes ciudaes, ellí'l
Hip Hop surdió mui influenciáu pola música xamaicano y polos ritmos
de la "música negro". Como nos demuestra la esperiencia, los
Estaos Uníos siempre fueron unos auténticos espertos n'esparder
los productos de la so cultura dende l'intre en que los asume la so
industria, y d'esta manera la onda espansiva d'esta corriente cultural llegó bien a España hacia mediaos de los 80. Los cuatro pegoyos
básicos de la cultura Hip Hop son la música de los DJ, ye dicir,
la mezcla de soníos y estilos colos platos y les meses de mezcles, el
Graffiti, como forma d'espresión urbana d'una cultura eminentemente
urbano, el rap, como portavoz y lletra del movimientu, y p'acabar, el baille,
que podemos identificar n'Asturies col break dance, que foi la primer
manifestación realmente conocida, o polo menos la más visual, del
Hip Hop n'Asturies.



Cuando'l break dance tomó les cais d'Asturies nos años ochenta
esti movimientu, que paecía que fuera namás qu'una moda, dexó un posu ente la mocedá asturiana. Años más tarde
vuelve a la actualidá'l Hip Hop n'Asturies, y esta vegada paez que llega
d'una manera más madura y con gana de quedar. Si nos centramos nes
manifestaciones musicales d'esta nueva fola del Hip Hop n'Asturies,
decatámonos de que son sobre too Xixón y les cuenques mineres los ñeros de los grupos que
tán poniéndo-y la banda sonora al rap n'Asturies. Los barrios urbanos onde la
crisis industrial d'Asturies entró a degüellu -lleendes urbanes aparte- son
los llugares onde una parte de la mocedá cuestiona un presente y un futuru que nun
permiten en muncho casos ser optimista. Nesti intre'l rap
conviértese pa estos mozos nuna forma d'espresar un mensaxe, un inconformismu
personal, políticu o cultural, que munches vegaes tien un caracter
identitariu. Con too y con ello, el rap tamién espresa la so cara
folixera, y hasta frivola, en munchos de los cantares.



Por facer un estoyu de los grupos y artistes qu'anguaño trabayen el xéneru n'Asturies nun queda dulda de que'l casu que más llama l'atención ye'l del grupu de la cuenca'l del
Nalón "Stoned Atmosphere". Esti dúu nun tien inda
discu espublizáu, pero solo con asitiar los sos cantares pa descargar na rede
internet tán convirtiéndose nun referente del rap astur. Les sos maquetes
tán disponibles en webs onde tán batiendo records, llegando a pasar de les decenes de miles de descargues en dellos casos.
Les sos lletres nun pasen nin tan siquiera raspien pelo politicamemte correcho, y ye que los versos y rimes del
so cantante, Arma X (Fran), péguen-y un repasu con "maldá"
confesa a temes que van dende la situación política mundial
hasta la d'Asturies o la del so barriu tooello dende la visión de la so esfera personal.
Con Asturies, y sobre too cola cuenca'l Nalón como referente, les lletres de los Stoned, que nun tienen problema n'echar pelos mitos y productos más vendibles de l'Asturies moderna como Fernando Alonso o Melendi, suenen sofitaes nunes bases mui ellaboraes compuestes por Ceeris y cola ayuda nos coros de
Franillo, tercer pata del tayuelu de Stoned Atmosphere.

Ye de sorrayar que, anque los más de los grupos de hip hop asturianos garren el castellanu como llingua d'espresión, ensin falta de salir de la cuenca alcontramos tamién a Ceeris, compositor de les bases de "Stoned Atmosphere" como responsable de los pegoyos rítmicos de "K-Nalón", proyectu de rap n'asturianu nel que la parte vocal cuerre de la man del raperu "Tori" .



En Xixón tamién tenemos exemplos de la bona
salú muscal del Hip Hop n'Asturies. "LOR", (el Llau Escuru de la
Rima), convertiéronse tamién un referente d'esti movimientu hiphoperu dempués d'asoleyar nel 2002 "Street Opera" que
confirmó que nos cinco componentes de "LOR" hai un discursu
coherente nel so rap. Nesti discu de "LOR" collabora úna de
les persones más importantes na escena hiphopera asturiana, el MC
"Dark la eMe". nome de guerra tres del que s'escuende Mario Fueyo,
ún de los motores del rap n'Asturies col so trabayu como productor,
pianista y músicu d'estudiu. Mario tien amás la virtú de movese n'estilos distintos como s'espeya nos
sos trabayos personales como "Esto no va a salir en vinilo". Dark la eMe tamién tien na rede internet una de les sos meyores ramples de llanzamientu, y asina ye qu'un de los temes que más tan sintiéndose d'esti MC asturianu ye "Un asturiano en Madrid" que garra descaradamente y ensin prexuicios la base del tema "Englishman in New York" de Sting pa resumir les vivencies y elxeitu de ver les coses de los asturianos de la "quinta del ALSA" que trabayen na capital del Reinu.



En Xixón tamién atopamos a "EduakapenN 1", artista con base nel barriu de Contrueces y componente amás d'otra de les bandes de la ciudá
xixonesa, "CTS". "EduakapenN 1" ye tamién el
productor de "Titanes", grupu de Xixón que nel
2003 espublizaron la so primer referencia "Trámites sin cumplir"
pa sacar sacar depués de 2004, col sofitu de "EduakapenN 1",
la so segunda grabación "Por lo que tu y yo sabemos".

Son
munchos más los grupos que xiren alredor del hip hop n'Asturies, con nomes como DJ Jona
n'Uxo, "Aktibistaz" de la cuenca'l Nalón o "Null Handicap" de Xixón ente otros, xente que ta demostrando que n'Asturies hai otru ñeru de creación musical, que
xunta otros estilos como'l folk, jazz, rock o el heavy, convierten a Asturies
nun país, de malpenes un millón d'habitantes, con una gran
vitalidá musical. D'una manera o d'otra, va haber que tar sollertes a lo que venga d'esta oriella de la música.