Hidroeléctrica: más potencia y más pufu

La eléctrica asturiana inauguró esta selmana el so primer centru de producción fuera d'Asturies. La central de ciclu combináu de Castejón (Navarra) nun ye solo la primer central que constrúi HC fuera de la llende astur, sinon que ye tamién la primer térmica d'HC que va funcionar a gas. Con una potencia de 400 mw, la central nueva aumenta la potencia total d'HC nun 20%, afitándose como'l cuartu xenerador del estáu. HC quier ponese agora colos dos proyectos que tien n'Asturies, la central a gas de Sotu Ribera y el tercer grupu, esti de carbón, nel valle d'Aboño, ente Xixón y Carreño.

Les centrales a ciclu combináu con gas natural de combustible son la moda que ta imponiéndose en tola península. Con un combustible igualmente importao, pero -polo menos de momentu- más barato que'l carbón, les térmiques de ciclu combináu consiguen un mayor rendimientu económicu al aprovechar meyor el combustible, los costes de construcción recupérense primero y amás contaminen menos que les convencionales. Sicasí, el fechu de que tean construyéndose ensin tasa en tol mundu ta llevando a una sobreesplotación d'otru combustible fósil qu'acabará escosándose: el gas, que lo traen lo más d'ello d'Arxelia y el norte d'África. Otramiente, la entrada en serviciu nun ta valiendo pa que se retiren del serviciu les centrales vieyes a carbón, y, anque contaminen menos, lo cierto ye que nun dexen de soltar emisiones.

Los planes de crecimientu d'HC nun acaben cola central de Castejón, y Asturies tien un gran protagonismu nellos. La otra selmana, HC fusionose con Adygensival, la sociedá qu'emplegaron Caxastur y EDP cuando compraron la eléctrica, colo qu'HC ta agora empufada por un importe de 2.000 millones d'euros de pasivu como resultáu de la reorganización accionarial. HC, que tien el 8% del mercáu de xeneración de corriente, y quier llegar al 10%, ta perdiendo clientes na estaya de distribución, pero quier enfotase más na de xeneración porque-y da más bneficios y amás el gobiernu garantiza que les centrales nueves van ser rentables.