Hidrocantábrico, una de les empreses más contaminantes d'Europa

Un estudiu de la prestixosa consultora PricewaterhouseCoopers esmucíu por Greenpeace analiza les emisiones de CO2 a l'atmósfera de les empreses europees. Según l'estudiu de la consultora americana, delles empreses españoles tan ente les que más diósidu de carbono vierten a l'atmósfera, rescamplando ente elles la eléctrica Endesa, que ye la cuarta absoluta de la llista con 73 millones de
tonelaes de CO2 al añu. La llista, que presenta a les venti empreses eléctriques más contaminantes del vieyu continente, inclúi tamién a l'asturiana Hidrocantábrico, que vierte 14 millones de tonelaes, les más d'elles peles centrales térmiques del nuestru país, qu'iguen cásique'l 100% de la producción de corriente d'HC. Perbaxo d'HC apaecen na llista otres eléctriques españoles como Iberdrola, con 8,5 millones de tonelaes.

La eléctrica asturiana aparez en primer llugar nun de los separtaos del estudiu de Price Waterhouse, el qu'estudia la media d'emisiones por unidá
de corriente producida. Si la media europea nesta estaya ye de 353 kg de CO2 por cada Megawatiu/hora, HC dobla la estadística soltando 916 kg de diósidu de carbonu a l'atmósfera por cada MWh que produz. L'antigüedá de los grupos térmicos de la eléctrica asturiana, que nun tan adaptaos a les normatives europees y el que la producción d'HC seya a base de centrales de carbón espliquen porqué la eléctrica asturiana ye la que más contamina por cada megawatiu que vierte a la rede.

L'estudiu de la consultora americana vien a salir agora que la UEe ta preparando'l sistema de cuotes de CO2 que les empreses van poder verter a l'atmósfera. La UE va ser quien reparta eses cuotes o "derechu a contaminar" ente los sectores contaminantes, que depués van poder cambialos ente ellos mediante un sistema de comerciu, neto que la cuota llechera. Greenpeace, entidá qu'esmució l'informe a la opinión público, diz qu'apuesta por criterios tresparentes y oxetivos a la hora de repartir los derechos d'emisión, y qu'esos criterios se debatan en Conseyu Nacional del Clima, evitando repartos "a deu" de les cuotes