Hidrocantábrico pasa a manes d'Electricidade de Portugal

Lo que se suponía que diba pasar dende que nel 2.001 Hidroeléctrica pasare a la órbita d'Electricidade de Portugal yá ye una realidá. Dende ayeri, per aciu d'un cambéu d'acciones con Caxastur y l'aseguradora Caser (filial de Caxastur) y gracies a l'alquisición del 35% del capital d'HC que tenía l'alemana EnBW, EdP, que tenía'l 40% de los títulos de la eléctrica asturiana, pasa a controlar el 95,7% de les acciones, mientres que Caxastur, que queda col 3% d'HC, pasa pela so parte a tener un 5% del capital d'EdP.

Ello da-y a la entidá financiera asturiana un puestu nel conseyu d'alministración de la eléctrica portuguesa, que ta acabante de crear asina'l tercer grupu eléctricu de la península tres d'Endesa y Iberdrola.

La operación tien un importe de más de 2.300 millones d'euros, que se reparten ente los más de 1.100 que necesitó EDP pa facese coles acciones del grupu alemán EnBW y les de Caxastur-Caser y los cerca de 1.200 que se precisen pa una ampliación de capital na que van entrar Caixa Geral de Depósitos (primer accionista d'EDP) y otres entidaes como Goldman Sachs, Millennium bcp, Morgan Stanley y UBS.

Dende la empresa anúnciase que la venta efectiva a la empresa portuguesa nun va llevar arreyada una desinversión n'Asturies nin una política de deslocalización, presentándose como garantíes d'esta rellación el fechu de que Caxastur queda con una participación del 3,1% n'Hidrocantábrico, conservando derechu a vetu en delles cuestiones. Otra de les posibles implicaciones de la venta d'HC ta nel futuru de Telecable, la filial de telecomunicaciones d'HC, que podría pasar a manes d'otra compañía.

L'anuncia de la venta a EdP d'una de les mayores empreses d'Asturies (HC ta valorada en bolsa nunos 4.000 millones d'euros) faise la mesma selmana en que'l presidente de la compañía eléctrica, Manuel Menéndez, amenazaba con una posible retirada d'inversiones n'Asturies en nueves instalaciones de xeneración si la empresa nun recibía un tratu preferente. Menéndez referíase al desbloquéu de les llinies d'alta tensión Soto-Penagos y Lada-Velilla y a la negativa del alcalde de La Ribera pa dar llicencia a la instalación del grupu térmicu nuevu que quier poner la compañía nel complexu de Soto. Esta mesma mañana, el Presidente asturianu Álvarez Areces recibía en despachu a Manuel Menéndez y Joao Talone, presidente d'EdP, pa falar sobre'l futuru de la eléctrica asturiana