Hevia va "Étnico ma non troppo"

El gaiteru maliayés José Ángel Hevia presentó la selmana pasada'l so tercer discu, "Etnico ma non troppo", un pasu más na carrera del gaiteru asturianu más famosu.

Esti discu ye'l terceru del gaiteru dende que firmare pola discográfica EMI, compañía cola que consiguió la fama nel mundu enteru col so "Tierra de nadie". Nesti últimu trabayu Hevia caltién la filosofía de discos anteriores, trabayar sobre pieces tradicionales asturianes y dalgunes composiciones, amestando a estes melodíes instrumentos y programaciones, amás de la ya famosa gaita midi. Pa esti discu contó colo collaboración de músicos de tendencies bien estremaes, el guitarrista Juan Manuel Cañizares, los Tenores de Bitti, Elías García, el batería Tino di Geraldo, la cantante Mari Luz Cristobal Caunedo, el grupu "Muyeres", Ramón Prada, amás de la banda habitual del gaiteru en directo.

"Étnico man non troppo", títulu que surde d´un xuegu de palabres nel que s´amiesta lo tribal colo clásico y que promete repetir (sinón superar) l´aceptación de los discos anteriores, fo grabáu y producíu pol propiu artista. Si queréis mercar ya esti nuevu discu d'Hevia podéis facelo na nuestra tienda.