Herrera y Anquela comenzaron a trabayar na temporada de vuelta del derbi asturianu

Sporting y Uviéu iniciaron los entrenamientos.

Esta mañana'l balón tornó a rodar per Mareo y El Requexón depués de selmanes de descansu de los futbolistes. Sporting y Uviéu presentáronse con poques cares nueves, siendo los bancos los que tomaron l'atención de los presentes, cola presencia de los recién llegaos Paco Herrera y José María Anquela.

El conxuntu de Xixón nun fixo nengún fichaxe entovía, anque paez mui cerca d'incorporase a la disciplina roxiblanca'l deportivista Álex Bergantiños. Los xugadores cedíos que retornen y siete xugadores del filial foron les úniques novedaes, mentes que Fernando Amorebieta nun llegó a entrenar tres firmar con Independiente.

Mentes, n'Uviéu, les cares nueves foron Carlos Hernández (Lugo) y Ramón Folch (Reus), yá qu'Aarón Ñíguez tien permisu tres terminar la Lliga más tarde col Tenerife. Anque tampoco yera una sorpresa, nun entrenó Esteban, que pasaría a formar parte del cuerpu téunicu del club, y Jon Erice, apartáu de la disciplina de la primer plantiya azul.

14 años d'espera

Fichaxes neuvos en dambos clubes nun van tardar en llegar nuna campaña na que l'ascensu va ser l'oxetivu de los dos clubes, que coinciden na mesma categoría 14 años depués. Les feches de los dos duelos de rivalidá van conocese'l día 20, cuando ta previsto'l sortéu del calendariu.