HC reclama lo de só

En 1996, el gobiernu del Estáu apautó coles compañíes eléctriques un pagu de 12.000 millones d'euros, conocíos como "el billón de les eléctriques", en conceptu de costes de transición al mercáu llibre (CTC o Costes de Transición a la Competencia). D'aquella, toles fuerces na oposición camentaron qu'aquello yera un regalu de perres públiques a les compañíes eléctriques, y incluso la UE reconoció qu'aquella midía nun yera demasiao razonable, y mandó al gobiernu quitar del recibu de la corriente'l 4,5% de recargu que se tasaba a cuenta de los CTC. Agora, seyes años depués, y ensin que se dea una situación de lliberalización real del sector, les eléctriques reclamen les perres que-yos queden por cobrar d'aquellos CTC, motivu pol que la patronal Unesa ta acabante de presentar una reclamación formal al gobiernu. Hidrocantábrico ye tamién acreedora de bona parte d'eses perres. Sicasí, anque a la eléctrica asturiana tóca-y l'ablayante cifra de 396 millones d'euros nel repartu, nun ye precisamente la que más perres llevaría, porque otres más grandes como Fenosa o Endesa tienen derechu a muncho más. Precisamente Endesa ye tamién noticia porque esta mañana hubo un gran apagón nel centru de Barcelona, neto que los que se dieron a últimos del añu pasáu y que llevaron a la Generalitat a multar a la compañía por nun atender bien el serviciu. Les semeyances colo que pasó de la que se lliberalizó'l mercáu eléctricu en California son como pa nun escaeceles.