HC controla l'operador llionés

Depués d'un mes llargu d'andar en tratos, la eléctrica asturiana Hidrocantábrico va ser l'accionista mayoritariu nel operador de cable y telecomunicaciones lliones Retecal al ser la empresa que más acciones va garrar n'ampliación de capital de 30 millones d'euros del operador llionés. HC, que n'Asturies ente les sos filiales l'operador asturianu de cable Telecable, que yá tenía'l 30% del accionariáu de Retecal, pero tres esta ampliación va quedar como mayoritariu al facese col 34,5% del capital del operador del otru llau del cordal.

Anque la operación d'ampliación nun dexa de ser un emburrión que l'operador llionés precisaba pa esparder los sos servicios y espoxigare en clientes, la prensa de Llión atalantaba tamién na operación un intentu de baltiar de la dirección de Retecal al empresariu José Luis Ulibarri, que nun alcontró munchu sofitu a la so xestión, dificultada pol enfrentamientu que calenía cola Conseyera d'industria de l'autonomía. LLama l'atención que'l Gobiernu autonómicu castellanu y Caxa España, partes interesaes nel futuru de Retecal, prácticamente nun contrataren cola empresa en tolos años que lleva apurriendo serviciu. Precisamente Caxa España, l'otru accionista mayoritariu foi quien fizo piña con HC contra Ulibarri, quien va recuperar el control na cadena d'emisores locales que tien a cambéu de parte de les acciones que dexa en Retecal.