HC anuncia que va menguar la contaminación de les sos térmiques

Electricidade de Portugal (EDP), al traviés de la so filial "Companhia Portuguesa de Produção de Electricidade" y de la so participada asturiana HidroCantábrico van echar a andar una alianza conxunta baxo la figura d'Agrupación Europea d'Interés Económicu pa contratar los equipos precisos pa menguar les emisiones atmosfériques de dióxidu d'azufre de les sos centrales térmiques en Sines (Portugal), Aboño y Soto. La inversión ye imprescindible pa que les térmiques del grupu,que tan ente les que más unidaes d'azufre y diósidu de carbonu vierten a l'atmósfera por unidá d'enerxía producida, cumplan colo que manda la UE en materia d'emisiones, y satisfagan, polo menos en parte, les esixencies de los grupos ecoloxistes, que cada poco anden denunciando los problemes de contaminación de les térmiques asturianes. L'Agrupación va tener sé n'Uviéu y cuéntase con que los equipos de filtraxe y desulfuración tean funcionando nes centrales del grupu pal últimu trimestre del 2007.

N'echando a andar los equipos descontaminantes, les emisiones d'óxidu d'azufre de los grupos tendrán de ponese nos topes que manda la llexislación uropea de 400 mg/Nm3 . La empresa esplica que la intervención descontaminante va facese sobre un parque termoeléctricu de 2 166 megawatios que vienenen a quemar nun un añu térmicu mediu sobre 7,5 millones de tonelaes de carbón.

En cuantes a la figura llegal escoyía, l'Agrupación d'Interés Económicu Européu ye una modalidá de asociación d'empreses acoyida a un reglamentu de la CEE del añu 85 qu'afala'l desarrollu de la cooperación ente empreses dientro de la Xunión Europea.