Haxa salú!

La frase cola que José Naveiras Escanlar, más conocíu por "Pepe'l Ferreiru" suel acabar los sos escritos tenemos que dedicá-yla güei a elli. Ello ye que que la Conseyería de Cultura d'Asturies anunció que va aprobar ayudes per importe de cerca de mediu millón d'euros al Muséu Etnográficu de Grandas, una institución entamada en 1.984 gracies al enfotu personal del Ferreiru y que ye anguaño un de los exes turísticos de la comarca. Ensin que les instituciones-y dieren l'ayuda que tienen otres instalaciones museístiques asturianes y ensin campañes publicitaries, esti muséu tuvo l'añu pasáu más de 22.000 visites, sólo la tercer parte que museos que mueven más del triple de presupuestu. Nun se sabe seguro en que van gastase les perres prometíes, porque de mano va haber que facer los planes d'esplotación y museolóxicu y un inventariu detalláu. L'escaezu en que taba esti muséu ye talu que'l so Conseyu, nel que tan les Conseyeríes de Cultura y Turismu, el Conceyu de Grandas, Caxastur, la Universidá y l'Asociación d'Amigos del Muséu, aconceyará'l 25 d'esti mes per primer vez en dos años.Pa dir conociendo'l Muséu puede visitase la so web, que se remocicó va bien poco y presenta agora un diseñu en flash bastante curiosu. Haxa salú!