Hasta que la boda nos separe", candidata asturiana nos "Premios Max" de teatru

El comité organizador de los Premios Max de les Artes Escéniques ta acabante de facer públicu'l llistáu de candidatos al premiu al Meyor Espectáculu Revelación. Esta categoría quier promover aquellos montaxes escénicos menos comerciales o que nunca son a salir fuera de los sos respectivos circuitos autonómicos.

Cada comunidá autónoma (sacantes Cantabria) tien tolos años un representante nesta final. Nel casu asturianu, nesta edición el nuestru representante va ser "Barataria Teatro" el grupu que lleva Roberto Corte, que presentó nel circuitu asturianu l'añu pasáu la obra "Hasta que la boda nos separe" obra de Ramón Lumbreras que s'inspira nes formes lliteraries de Ramón Gómez de La Serna.

Roberto Corte y el so grupu "Barataria Teatro" lleven funcionando dende 1996, anque ficiéronse con un nome na escena teatral asturiana interpretando va dos años la obra n'asturianu "Gasolina con capullos" na que trataba la rellación entre un inmigrante illegal, vendedor de capullos de rosa y una inadaptada social que s'alcuentren nuna gasolinera. La obra foi una de les grandes trunfadores nos "Premios Asturies de les Artes Escéniques" del 2002 consiguiendo los premios al meyor espectáculu, meyor autor, meyor actor y actriz protagonistes y meyor director d'escena. Nel 2004, con "Hasta que la boda nos separe" repitieron na estaya de meyor espectáculu y meyor director d'escena, mientres qu'Eva Vallines quedó como meyor intérprete femenina
Más información na web de Barataria Teatro