Hamás aceptaría un referendu sobre un acuerdu de paz con Israel

Nuna rueda prensa ofrecida en Gaza, el líder de Hamás, Ismail Haniyeh, mostró un relaxamientu de la postura del grupu de prohibir la cesión de cualquier territoriu que perteneciera a la Palestina que tuvo ocupada’l Reinu Uníu hasta 1948.

"Aceptamos un Estáu palestín coles fronteres de 1967 y con Xerusalén como capital, la lliberación de los presos palestinos y la resolución de la cuestión de los refuxaos", dixo Haniyeh en referencia al añu en que se llibró la guerra na qu'Israel tomó Xerusalén Este y los territorios palestinos.
  
"Hamás va respetar el resultáu (d'un referendu) anque difiera de la so ideoloxía y los sos principios", pero siempre qu'incluya a tolos palestinos de la Franxa de Gaza, Cixordania y la diáspora.
  
La carta de Hamás, que se redactó en 1988, considera que tol territoriu de Palestina, incluyíu lo qu'agora ye Israel, ye patrimoniu de los musulmanes. La idea de celebrar un plebiscitu sobre un futuru acuerdu de paz con Israel refugáronla dellos líderes de Hamás cuando la propunxo'l presidente palestín, Mahmud Abbas, hai dellos meses.
  
Haniyeh indicó qu'Israel nun quier conceder a los palestinos la posibilidá de tener un Estáu dafechu soberanu y, poro, nun espera que los esfuerzos pa volver a entamar les conversaciones de paz directes ente ambes partes --que tán interrumpíes porque Israel niégase a prohibir la construcción nos asentamientos xudíos asitiaos en territoriu palestín-- tengan éxitu.

Llamáu a la comunidá internacional  
El líder de Hamás destacó que'l so grupu ta deseando cooperar colos países occidentales y europeos "que quieran ayudar al pueblu palestín a recuperar los sos derechos". Estaos Uníos y la Unión Europea califiquen a Hamás d'organización terrorista y nun reconocen la so autoridá na Franxa de Gaza.
  
"Encamentamos a los ministros d'Asuntos Esteriores europeos que revisen la so postura al respecto de les reuniones col Gobiernu escoyíu", manifestó Haniyeh, qu'añadió que Hamás caltiénse en contactu con responsables de la ONU na Franxa de Gaza pa tratar esti asuntu.
  
Per otru llau, Haniyeh negó qu'Israel matare'l pasáu mes de payares en Gaza a tres miembros d'A'l Qaeda. Según Tel Aviv, dos d'esos trés milicianos taben entamando atentaos contra turistes israelinos y occidentales nel territoriu exipciu de la península del Sinaí.
  
El xefe de Hamás aseguró qu'una de les prioridaes del so Gobiernu ye evitar un gran enfrentamientu militar con Israel intentando convencer a otros grupos milicianos de que respeten l'altu'l fueu que se caltién de facto. Nesti sen, recordó que Hamás alloñóse delles veces d'Al Qaeda y nun dudó en condenar los atentaos d'esti grupu terrorista.