Haidar pide qu'España "nun xuegue a Poncio Pilatos" col Sáh.ara

|

L'activista sah.ariana Aminetu Haidar alvirtió que'l Gobiernu español "nun pue xugar a Poncio Pilatos tratando por igual al frente Polisariu y a Marruecos" y pidió a la comunidá internacional qu'evite un "nuevu bañu de sangre".

"Miles d'exialios sah.arianos montaron, dende hai cuatro selmanes, un campamentu de tiendes pel entornu de la ciudá d'El Aaiún, nel Sáh.ara Occidental baxo ocupación marroquina, pa espresar el so refugu categóricu a les sos condiciones de vida y la so negativa a renunciar a los sos derechos más elementales", manifestó la presidenta del Colectivu de los Defensores Sah.arianos de Derechos Humanos (CODESA) nun comunicáu.
  
L'activista alvirtió que, dende hai algunos díes, la tensión ta aumentando por cuenta de "la llegada al llugar de nuevos medios y de militares oficiales que podríen acabar nuna acción de violencia pa desagospiar pola fuerza a los manifestantes pacíficos".
  
La comunidá internacional "tien que facer tolo posible pa evitar un nuevu bañu de sangre n'El Aaiún, tanto más cuanto que les fuerces marroquines yá ficieron usu de les sos armes el 24 d'ochobre del 2010, causando la muerte del mozu Nayem Elgarhi y firíes a otros cinco sah.arianos", prosiguió Haidar.

"Poncio Pilatos"
"España sobremanera y por razones históriques tien que facer usu de la so influencia p'algamar la solución d'esta crisis y acelerar un desenllaz del problema del Sáh.ara Occidental que seya conforme a derechu y a la llegalidá internacional", alvirtió. "España nun pue xugar a Poncio Pilatos tratando por igual al frente Polisario y a Marruecos", manifestó.
  
"Nel centru del problema alcuéntrense'l pueblu sah.arianuy los sos derechos lexítimos", señaló. "O se ta col derechu o se ta en contra, el Gobiernu español nun pue xustificar la neutralidá frente a los derechos d'un pueblu en peligru", acabó Aminetu Haidar.

L’activista sah.ariana protagonizara a últimos del 2009 una fuelga de fame de 32 díes de duración en Lanzarote, dempués que les autoridaes marroquines prohibiéren-y acceder a la so ciudá, El Aaiún.
 

Contador Estadistiques