“Hai posibilidá d’un modelu amable d’oficialidá, a l’asturiana”, defende Barbón

L’informe sobre la oficialidá centró les entrugues de PP, Ciudadanos y VOX a Adrián Barbón na segunda sesión del Plenu de la Xunta Xeneral. El presidente insistió na argumentación dada polos conseyeros del so Gobiernu’l martes y insistió en que “hai posibilidá d’un modelu amable d’oficialidá, a l’asturiana”.

“¿Hai un únicu modelu d’oficialidá n’España? ¿Ye’l mesmu modelu d’oficialidá’l qu’aplica Galicia que’l qu’aplica por exemplu Catalunya?”, entrugó Barbón a Teresa Mallada en referencia a la posición del PP d’estos díes sobre que “namái hai un modelu d’oficialidá” basándose na so interpretación del informe sobre la oficialidá. “Hai que reconocer entós que nun hai un únicu modelu d’oficialidá, póngase como se ponga”, siguió.

“Siguimos defendiendo qu’hai posibilidá d’un modelu amable, a l’asturiana, y hai trés cuestiones que son posibles constitucionalmente: que nun haya vehicularidá obligatoria del asturianu, que nun haya billingüismu obligatoriu del asturianu y que nun sía requisitu imprescindible pal accesu a la función pública. Hai posibilidá constitucional”, añadió Barbón.

La entruga de la presidente del PP d’Asturies fora “si a vusté-y ocultaron el ‘Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies’, axudicáu pola Conseyería de Cultura, Política Llingüística y Turismu a la Fundación Universidá d’Uviéu como contratu menor nel cuartu trimestre del 2020, ¿por qué nun cesa a los responsables”. Llueu Mallada acusó a Barbón de mentir a los asturianos y d’ocultar información, a lo que’l socialista respondió na mesma llinia que los sos conseyeros: “los informes sólo pasen a formar parte del Conseyu de Gobiernu cuando formen parte d’un procesu alministraticu, como-yos esplicó ayeri didáuticamente’l vicepresidente”.

Barbón reconoció qu’ayeri lleó les conclusiones del documentu “pa venir a esti Plenu”, anque nun dio la so opinión sobre’l mesmu, “y por eso me sorprende que vustedes foran quien a lleer en dos hores un informe de 240 páxines, que si ye asina, dende llueu nun sería llectura comprensiva, superaron tolos récors”, ironizó. Por último, aseguró que “cuando vusté dexe de ser presidenta interina del PP, verá cómo’l Partido Popular cambia, migra la so posición y toma aires nuevos; eso aires que vienen de Galicia tamién se van contaxar al Partido Popular. Nun sé si agora, nun sé si nel 2023, pero dende llueu dientro de mui pocos años vamos velo y vusté recordará estes pallabres”.

Enantes Mallada dixera-y que “nun se faiga vusté falses esperances porque Feijóo tien clarísimes les diferencies ente la realidá llingüística d’Asturies y de Galicia”.

L’efeutu contaxu na derecha

Tamién entrugó pol mesmu asuntu Susana Fernández Álvarez, vocera de Ciudadanos, en concreto “¿Considera que’l Gobiernu del Principáu ye honestu y tresparente colos asturianos?”. Na so intervención acusó a Barbón de querer “estafar a los asturianos, mintiendo, engañado y ocultando información relevante” y de “querer colar el bable” cola reforma del Estatutu.

Na réplica, el socialista criticó’l discursu de la diputada, “tal paez que toi sintiendo al señor Blanco”, y llamentó “l’efeutu contaxu” de VOX na derecha. Insistió con que l’informe ye “un documentu de trabayu” y “conozo los que s’eleven al Conseyu de Gobiernu, lo que ye la mio obligación”, y recordó que “yera de parte, que nun son les tables de la Llei nin marquen el camín a siguir pol Gobiernu d’Asturies”.

Por último, calcó en que “la oficialidá pue modulase”. “Nun taba ocultu y nun hai una única oficialidá”, ratificó.

Disculpes por poner en dulda l’estáu de salú de Piñán

El tercer partíu en tocar esti tema foi VOX, que preguntó si “¿va vusté a dimitir llueu d’engañar a tolos asturianos?”. En primer llugar, Barbón esixó a Ignacio Blanco disculpes por poner ayeri en dulda l’estáu de salú de la conseyera Berta Piñán, positivo por COVID-19, lo que’l diputáu fixo na réplica.

Blanco insistió en que “nos mintió a toos”, afirmó “que l’únicu modelu imposibe d’oficialidá ye’l que defende vusté” y apuntó sobre l’informe que “si nun lo lleó debe dimitir, y si nun lu informaron debe cesar al so xefe de gabinete”. “A vusté l’informe importa-y un res, vamos ser claros”, respondió Barbón, qu’acusó al voceru de VOX de “tener una fonda falta de respetu permanente a lo que significa ser asturianu”.

“Vusté nun reconoz que l’asturianu sía una llingua, vusté atácalu, y atacando eso ta atacando a la fala habitual y tradicional de los pueblos d’Asturies”, recrimó-y el socialista al tiempu que tornó a insistir na so argumentación sobre l’informe.