Habrá que pagar pa ver El Mundo

Dende primeros d'esti añu lleva ruxéndose pela rede que los grandes periódicos españoles diben cobrar por ver los conteníos de les ediciones electróniques. La idega nun salió de la cabeza de nengún gurú español de les nueves tecnoloxíes, sinon que ye importada d'otros llugares onde esta moda parez que ta convirtiéndose en norma. Ello ye que diarios franceses de tanta tirada como Liberation yá cobren dende va unos meses por entrar a delles secciones del periódicu como la hemeroteca o les informaciones empobinaes a un públicu más específicu, como les d'economía. Agora l'amenaza cúmplese y yá hai un primer periódicu español que va cobrar polos conteníos. La edición dixital del diariu El Mundo, que yá tien delles secciones d'accesu restrinxíu, dexará de ser de públicu accesu dende'l día 15 d'esti mes, obligando a quien quiera ver el periódicu a facese soscriptor y pagar la tarifa, de cien euros al añu la más barata, que va cobrar d'agora en p'alantre. El Mundo ye de los pocos periódicos qu'ufierten una completa hemeroteca qu'inclúi tolos artículos que lleva enxertando na rede dende l'añu 1996, una fecha que certifica'l papel de periódicu pioneru nel mediu dixital. Ello nun quitó pa que'l diariu que dirixe Pedro J. Ramirez perdiere l'añu pasáu cerca de 300 millones de pesetes, unes perdes que xustifiquen el pasu al "pay per view" una aventura que tampoco ellos mesmos saben seguro si-yos saldrá al dereches, porque lo normal ye que l'internauta refugue pagar polo que venía disfrutando de baldre. Sicasí, El Mundo nun ye'l primer diariu del Grupu Recoletos que s'apunta a la pagadera, na que yá tan metíos el diariu económicu Expansión y la revista del corazón Hola.