Habemus papam

El misteriu ta acabante de desvelase.Yá se conoz la identidá del nuevu Papa de la Ilesia Católica. Tres d'un cónclave curtiu nel que nun hebo requexu nengún pa la sorpresa, l'escoyíu pa soceder a Xuan Pablo II al frente de la Ilesia nun ye otru que'l cardenal alemán Joseph Ratzinger (Bavaria - Alemaña 1926), precisamente un de los homes fuertes del mandatu del Papa anterior y del que se diz que foi clave nel so día pa que saliere Papa Karol Wojtila. L'escoyíu ye tamién el decanu de los 115 cardenales del cónclave y tamién un de los más polémicos por ser ún de los que presentaben un perfil más conservador, siendo conocíu dende va unos años pol títulu del "cardenal del non".

Josep Ratzinger, yá Papa baxo'l nome de Benedicto XVI, ta acabante de dar les sos primeres pallabres como Papa definiéndose como un "obreru de Dios" y impartir la so primer bendición urbi et orbe. La misa de coronación, que va celebrase en pocos díes, vaser el trámite definitivu que roble'l so ascensu al tronu de la Ilesia católica.

El fumu blanco salió a les 17:50 h pela chimenea de la Capilla Sistina anunciando que la ilesia católica tenía un nuevu líder. Darréu d'ello, el ruiu de les campanes del vaticanu confirmaba l'anuncia. Pa sabese la identidá del socesor de Xuan Pablo II namás se precisaron dos fumates prietes enantes de que s'escoyere un nuevu Papa nun cónclave que resultó más curtiu de lo que se contaba, y ye que nel sieglu XX namás León XIII, Pío XII y Xuan Pablo I salieron al segundu día de de cónclave.

La TV vaticana apurre señal en directo