Gutiérrez pide que'l PERTE de la Lengua tenga en cuenta al asturianu

Agradeció a la Comisionada Especial pa la Alianza por la Nueva Economía de la Lengua, Cristina Gallach, la so "sensibilidá" pa con ello.

La viceconseyera de Cultura, Política Llingüística y Deporte, Ana Vanessa Gutiérrez, participó ayeri na clausura de la 'Reunión Anual de Directores' del Instituto Cervantes, desendolcada nel Aula Magna del Edificiu Históricu de la Universidá d'Uviéu, na que tamién tomaron parte'l presidente de la institución, Luis García Montero; el rector Ignacio Villaverde; la propia Gallach, qu'informó de dalgunos de los conteníos del 'Informe del estado actual de los corpus en español, lenguas cooficiales y variantes del español, estudiu del Cervantes y el Ministeriu d'Asuntos Económicos y Tresformación Dixital editáu en formatu llibru de 96 páxines; y Francisco Moreno, direutor del Observatorio Global del Español, qu'avanzó'l funcionamientu y oxetivos d'esta iniciativa que va tener sede en La Rioja. Poníase asina fin a trés díes de trabayu de los cuasi 80 responsables de sedes del Cervante y el so equipu direutivu nos que tamién hebo oportunidá de conocer la creación n'asturianu.

La escritora, qu'emplegó'l castellanu na intervención, dirixóse a ellos apuntando que tresporten na maleta "el nuesu ciñu, pero sé que tamién vos lleváis una parte mui importante de la nuesa cultura, de les nueses llingües propies, del nuesu repertoriu musical, del talentu de la nuesa cinematografía más recién, del nuesu patrimoniu histórico-artísticu, de la diversidá de voces y espresiones de los nuesos creadores. Lleváislo como embaxadores, como guardianes de la cultura asturiana tamién pel mundu".

Tuvo pallabres pal PERTE de la Nueva Economía de la Lengua, que "reconoz la diversidá llingüística española, una diversidá llingüística que ye un patrimoniu cultural que merez ser divulgáu y preserváu, llingües que tienen la so historia, la so riqueza y el so papel na cultura d'esti país. Reconocer y fomentar esa diversidá llingüística española ye reforzar la identidá cultural y dar voz tamién a toles comunidaes que falen eses llingües".

"Como sabés, y amás tuvo mui presente estos díes", siguió Gutiérrez, "l'asturianu ye una de les llingües españoles que necesita promoción y representación. Anque entovía nun sía oficial, ye una parte integral de la cultura asturiana y como tal ha ser tratada, con respetu y con cuidáu, dalgo que l'Instituto Cervantes facéis con sumu cuidáu".

Por últimu, quixo agradecer a la comisionada, "querida Cristina, l'atención y la sensibilidá cola que viniesti, atendiendo la nuesa solicitú pa que'l PERTE, qu'a priori nun inclúi específicamente estes llingües que tán reconocíes nos estatutos d'autonomía pero qu'entá nun son oficiales, como ye'l casu del asturianu, les tenga en cuenta en desarrollos que puedan afeutar al conxuntu de les llingües del Estáu".

Na imaxe, Gallach, Montero, Villaverde, Gutiérrez y Moreno.