Gutiérrez Lueje marca'l récor femenín de la Travesera, na que Merillas foi'l más rápidu

El bercianu entró en meta una hora enantes que'l segundu, el ḷḷenizu Hugo Cerezo.

La canguesa Claudia Gutiérrez Lueje, vencedora de les dos ediciones últimes, completó una carrera sensacional que-y permitió ganar la XIX Travesera Integral Picos de Europa en categoría femenina y, al empar, marcar el récor de la prueba: 13 hores, 21 minutos y 5 segundos. L'atleta del Avientu y filóloga superó la marca anterior en 20 minutos, que pertenecía dende'l 2017 a la balear Eva María Moreda, que rexistrara 13 hores, 41 minutos y 18 segundos, un tiempu que tamién ameyoró'l sábadu la vasca Mayi Mujika al facer el percorríu en 13:40:58.

Una gran prueba realizó igualmente Manuel Merillas, del Club de Montaña La Bóveda, que tardó 10 hores, 15 minutos y 13 segundos en facer los 74 quilómetros ente Cuadonga y Arenas, percorríu con un desnivel positivu de 6.560 metros y negativu de 6.585. El ganador nel 2015, 2018, 2019 y 2021 consiguió'l so quintu trunfu nuna carrera na que Cerezo foi'l segundu (11:17:53) y el tamién asturianu Pablo Ochoa, el terceru (11:20:54) de los 450 deportistes que tomaron parte –foi necesariu un sortéu al haber 950 preinscripciones– na carrera qu'esti añu salió a les 2 hores d'El Repelao.