Guti presentó la segunda parte del métodu de gaita

José Manuel Gutiérrez, "El gaiteru Guti" presentó ayeri'l "segundu cursu del métodu de gaita asturiana" segundu d'una riestra de de llibros que l'autor, director de la Banda de Gaites Cudá d'Uviéu concibe como testos válidos pa la enseñanza musical acordies colo que manda la LOGSE y qu'apaecen depués de que s'aprebare en Madrid el grau elemental y mediu de la enseñanza de gaita. Aparte de la entrada de la gaita nel sistema educativu, el maestru gaiteru tamién fizo un llamáu a la meyora de la situación llaboral de los intérpretes de gaita, argumentando que n'Asturies hai "1.300 paraos" nesti instrumentu y que nun se fai res por ellos

Un añu depués de la presentación del primer llibru de la colección el gaiteru carbayón presentó puntualmente esta segunda obra na sé de la SGAE, onde esplicó qu'esta mesma selmana va entamar la distribución de la obra, que se centra nel estudiu de los ritmos ternarios. Xunta la parte de técnica musical y les inevitables partitures, la obra inclúi tamién biografíes de dos importantes intérpretes y compositores de gaita, Nicanor González Fueyo y el gran José Remis Ovalle.