Gustavo Bueno echa pel conceyu de Xixón llamando a los sos responsables “analfabetos”

El filósofu y profesor eméritu de la Universidá d'Uviéu, Gustavo Bueno, manifestó que'l Conceyu de Xixón retiró-y una subvención de 12.000 euros a la Fundación qu'él mesmu preside porque son "incultos y analfabetos". "El Conceyu piensa que na Fundación facemos xuntes escontra'l PSOE", añadió Bueno.

El profesor retiráu de Filosofía realizó estes manifestaciones al'axencia Europa Press momentos enantes d'aconceyar la Comisión pa la Recuperación de la Memoria Histórica creada pol alcalde d'Uviéu, Gabino de Lorenzo, pa cambiar el nome de les cais franquistes y de la que Bueno forma parte. El filósofu asturianu, qu'aseguró que s'enteró pola prensa de la retirada de la sovención, esplicó qu'hai dos niveles diferentes nel asuntu. El primeru, dixo, "el Conceyu de Xixón pue retirar la subvención ensin dar nenguna esplicación", y el segundu, manifestó, que la "represalia" nun foi por dalgo tan puntual como la publicación del so llibru 'Zapatero y el pensamientu Alicia. Un presidente nel país de les maravilles', sinón por dalgo más "global".

Gustavo Bueno dixo entender que la 'Selmana Negra' "ye dalgo que atrai a munches persones y que'l mundiu de la filosofía ye dalgo pa unos pocos". Amás, detacó que la Fundación "fai un gran llabor y convida a xente de toa España y d'América". Bueno manifestóse nestos términos dempués de que'l Grupu Municipal Popular alertara ayeri, per mediu del conceyal Manuel Pecharromán, de que'l Conceyu de Xixón retirara la subvención qu'anualmente recibía la fundación de 12.000 euros.

Pela so parte, el conceyal de Cultura del Conceyu de Xixón, Justo Vilabrille, negó que'l Conceyu denegara la subvención a la Fundación Gustavo Bueno, pa la celebración del so alcuentru anual. Según l'edil, "nun hai nenguna decisión de tipu políticu nin ideolóxicu" que se tenga en cuenta a la hora d'otorgar sovenciones. Nesti mesmu sentíu pronuncióse güei'l voceru de la Xunta de Gobiernu del Conceyu de Xixón, José María Pérez, qu'aseguró que "nun se-y denegó a nenguna entidá la so subvención pal 2008". El responsable municipal precisó que lo que debe facer agora la entidá que preside'l conocíu filósofu ye solicitar l'ayuda mediante convocatoria.