Guerra ente’l Conseyu de la Mocedá y el Principáu

El Conseyu de la Mocedá del Principáu d'Asturies (CMPA) dio ayeri una rueda de prensa pa manifestar tolos puntos d'enfrentamientu que tien col Institutu Asturianu de Mocedá, órganu del que depende la so financiación.

Según denuncia'l CMPA, l'Institutu de mocedá tien l'oxetivu de desmantelar la política de mocedá cola sida de la mengua de gastos, citando la cancelación d'ayudes a dellos programes y la mengua de subvenciones a les asociaciones como casos prácticos d'esta política que supón el mayor ataque a les polítiques de mocedá "dende'l tiempu de Pedro de Silva". Los espacios de que se dispón pal desarrollu d'actividaes tamién tan acusando esa mengua presupuestaria, y mientres la Sala Borrón, espaciu d'arte mozu financiáu pol Principáu, ta endureciendo les condiciones pa llevar n'itinerancia per Asturies les esposiciones qu'organiza, la mesma sede del Institutu de Mocedá ta en procesu alministrativu de venta.

La retirada de la subvención del Institutu de Mocedá a la Escuela de Seronda ye otru más de los golpes de tixera que ve'l CMPA, que carga directamente contra la directora del Institutu Carmen Barrera, a la que-y pide que dimita acusándola de retrasar indefinidamente la ellaboración de planes de mocedá y d'estudios sobre la mocedá asturiana, de los que l'últimu tien fecha de 1996. La perda de places nos programes de campamentos de branu, al empar que se dobló'l preciu pa poder dir a estos campamentos, ye otru de los recortes polos que se pide la dimisión de Carmen Barrera, anque más grave ye pal CMPA'l que se da nel casu de los campos de trabayu, programa d'actividaes pol que l'Institutu Asturianu de Mocedá concede subvenciones a los Conceyos qu'estos emplegaben en campamentos de trabayu y que sigue erntregando les mesmes cantidaes dende l'añu 1989, ello arriendes de que les ayudes a campos de trabayu, enantes abiertes a tolos conceyos de menos de 25.000 habitantes, tan agora llendaes a los de menos de 5000.