‘Güeli’ llega a la quinta edición llueu de vender 2.000 exemplares

Tardó 20 díes n’escosar 500 exemplares y poco más de dos años depués yá va polos 2.000. ‘Güeli. Histories d’amor y remangu’, asoleyáu pola marca de ropa Puru Remangu llueu d’una iniciativa n’Instragram, yá va pola quinta edición, qu’añade fueyes en blancu na parte final del llibru pa que’l llector pueda incorporar la esperiencia propia xunto a una semeya de la so güela.

A lo llargo de les sos 96 páxines esti títulu inclúi 35 histories escrites por nietes y nietos escoyíes ente tolos aportaos polos usuarios d’esta rede social na campaña pa recordar a les güeles. Asina, rellatáronse vivencies como’l fechu de deprender a montar en bici, viaxar a Venèsia, emigrar a Francia, trabayar de carbonera o nuna fábrica de conserves, y montar un cine na cuenca del Nalón, ente otres.

“Histories escrites dende’l cariñu, que representen a toa una xeneración y que gracies a esti llibru tán quedando pa la posteridá”, apunten dende Puru Remangu, que vio la necesidá de llevales al papel pa qu’éstes nun se perdieran. L’ésitu de la idea d’Enar Areces foi espectacular, como amuesen esos 500 exemplares vendíos en dos selmanes y los más de 2.000 en poco más de dos años.

La quinta edición yá ta nes llibreríes y incorpora una novedá: “Inclúi unes páxines finales en blanco pa que quien tenga’l llibru puea escribir la historia de so propia güela y apegar una semeya d’ella”, apunten dende Puru Remangu, que celebra tea algamando’l so oxetivu de “homenaxar la historia de les güeles asturianes, eses heroínes anónimes que criaron, educaron y llucharon por dexanos un futuru meyor”.