Güei echa andar Llanes al Cubo

Un pasacais del grupu Nun Tris abre esta tarde a les 19:00 hores la edición d'anguaño de "Llanes al Cubo".

A partir d'esa hora, y a lo llargo de les trés díes siguientes, un cientu d'actividaes van enllenar la localidá del oriente asturianu. Les principales atracciones d'esti "Llanes al Cubo" son como non los conciertos nocturnos, qu'esti añu mecen a grandes nomes del folk asturianu con representantes de lo vien a llamase flamenco-pop. Por exemplu güei vienres la nueche va traenos a los ayeranos "Tarañu" na carpa B a les 21:00 hores, que van sirvir d'anticipu pa los conciertos nel escenariu central na carpa A que van entamar a les 22:00 hores. Ellí van tocar el gaiteru Xuacu Amieva cola so banda, darréu va tocar "Acetre", un perinteresante y veteranu, creóse en 1976, grupu estremeñu que dende equí queremos recomendar. P'acabar el vienres vamos tener l'actuación d'otru grupu tamién mui recomendable como son los irlandeses "Altan". Esta banda tamién ye una veterana na escena folk internacional, más de venti años sobre los escenarios son bona preba d'ello, anque siguen en forma cola publicación de "The Blue Idol", l'últimu discu d'esti grupu que representa, xunta bandes como "Lunasa" o "Chieftains", lo meyor del folk irlandés.

Pal sábadu y pal domingu Llanes va siguir ufiertando más música y actividaes. Ente toes elles queremos facer rescamplar les actuaciones de Raimundo Amador xunta "Chambao" y "El Bicho" el sábadu, y el conciertu folk nocturnu del domingu pela nueche. Ellí van actuar "Urban Treed", el grupu belga con un estilu perguapu que garró fama cola so participación nel festival d'Eurovisión con un cantar "folki" nun idioma inventáu por ellos. La otra banda foriata de la nueche van ser los ingleses "Flook", una auténtica maraviya del folk acústicu de corte clásicu, onde rescamplen sobre manera la técnica del so bodraneru John Joe Kelly, y el xuegu de les xiblates de Sarah Allen y Brian Finnegan.

Pa conocer más al detalle tolo qu'ufierta Llanes esti fin de selmana, convidamos a los nuesos llectores a visitar la páxina web de "Llanes al Cubo".