Grupos ecoloxistes protesten énte la intención de Cogersa d'incinerar basura

La Coordinadora Ecoloxista d'Asturies y Ecoloxistes n'Acción emitieron ayeri durísimos comunicaos de prensa nos que denuncien que l'ente autonómicu de Xestión de Residuos (Cogersa) aprobó echar a andar una planta d'incineración de residuos en vertederu de Serín

La Coordinadora Ecoloxista dio a conocer que'l Conseyu d'Alministración de Cogersa aprebó la creación d'una planta d'incineración de residuos pa la zona central d'Asturies. Fructuoso Pontigo, de la Coordinadora Ecoloxista, denuncia qu'amás de la gravedá qu'ello supón, pa evitar l'efectu negativu énte la opinion pública que podría tener la incineradora, Cogersa preséntala públicamente como "de valorización enerxética de residuos" pa dar a entender que se trata d'un proyectu sostenible ambientalmente.

La Coordinadora Ecoloxista, que da anuncia de que va facer tolo posible pa que la planta incineradora nun llegue a ser realidá, diz que la incineración esparde pel aire, l'agua y la tierra les sustancies tóxiques que tan presentes na basura, usando l'atmósfera como un vertederu al traviés del que los contaminantes van entrar en contactu colos alimentos y col ser humanu, una afirmación que los conservacionistes defenden con estudios médicos que demuestren que se da un aumentu de les patoloxíes venceyaes a das a la incineración de basura en distancies d'hasta 10 Km. Asitiando la incineradora en Serín, d'ello sal que nesi radiu vivimos 600.000 asturianos que tendríemos que respirar gases cargaos de dioxines, furanos y metales pesaos, amás de residuos sólidos d'altu conteníu tóxicu y otros desconocíos.

Los daños d'estos materiales en suspensdión sobre la salú humana son munchos y graves, según esplica'l grupu ambientalista que diz que mientres per una parte los metales pesaos ataquen al Sistema Nerviosu Central y dañen los fetos, per otra les dioxines y furanos puen criar cáncanu en dellos órganos, sobremanera'l fégadu. D'otra manera, los gases de la planta provocaríen tamién un aumentu del asma y daños repiratorios al amestase al problema de contaminación que yá carez el centru d'Asturies.

Contra l'apueste por esta planta, los grupos ecoloxistes piden que se faiga más recoyida selectiva, menguar los volúmenes de residuos y compostalos pa facer abonu, que dicen que ye l'alternativa con menor coste ambiental.