Grupos asturianos van grabar un discu d’homenaxe a “Los Rebeldes”

El rock asturianu axúntase pa facé-yos un homenaxe a la mítica banda catalana "Los Rebeldes". Un bon garapiellu de grupos asturianos ente los que s'alcuentren Mala Reputación, Babylon Chat, Bourbon, Los Bruscos, Chicotes, Crash, Factor X, Michelle, Tomás y los demás, Indecisos, Ulan Bator, Despreciables y xente a títulu individual como el guitarrista Rafa Kas, o'l ex de los Stukas Carlos Martagón van participar na grabación d'un discu que va entitulase "Territorio Rebelde" que se cuenta con asoleyar pa la seronda.

La grabación va correr a cargu de dos técnicos de renome como Moi García y Pablo Viña y la distribución va correr al cargu d'una casa nueva, tamién asturiana, y que va llamase Malespulgues Records. La iniciativa corre al cargu del club de rock'n'roll de Pravia Ann Alley.

Pal trabayu discográficu que va presentase pa la parte de setiembre va calecese l'ambiente con conciertos y "Sesiones Rebeldes" con toles bandes participantes en diferentes llugares de Pravia nos que les bandes van presentar el tema qu'enxerten nel CD dientro del so repertoriu.