Grupos ambientales y animalistes recurren contra’l control poblacional de llobos nos Picos d’Europa

Nueve grupos ambientales y animalistes presentaron un recursu d’apelación no gubernativu contra la resolución que permite’l control poblacional de llobos nos Picos d’Europa. Yá se mataron dos exemplares de los seis previstos.
 
Según espliquen estes organizaciones nun comunicáu, la decisión del direutor del Parque Nacional de los Picos d’Europa, Rodrigo Suárez Robledano, d’autorizar un control poblacional del llobu nel llugar “va contra la normativa del parque y nun tien argumentos téunicos, nin sociales, nin económicos que lo xustifiquen”, amás de que “se faen ensin publicidad dalguna” al nun espublizase nin nel BOPA nin nel BOE. Los grupos ambientales y animalistes firmantes consideren que la resolución qu’impugnen “nun se dicta realmente pa prevenir daños na ganadería, que nun los hai nin tán constataos, nin pa reducir la medra de población del llobu, que nun aumentó, sinón por razones esternes al conflictu supuestu”. Na so opinión, la decisión d’acabar cola vida de seis exemplares tien l’oxetivu de “obtener réditos eleutorales énte les presiones del seutor ganaderu”.
 
Tamién apunten que tovía nun s’aprobó’l Plan Rector d’Usu y Xestión del Parque Nacional de los Picos d’Europa (PRUX) “polo que se pue declarar que se ta xestionando dichu espaciu, y en concreto, ta procediéndose dende la direición del Parque Nacional a ordenar la muerte d’exemplares de llobu ibéricu y d’otres especies autóctones ensin la cobertura necesaria y obligada que supón l’instrumentu de planificación y xestión que ye’l PRUG”. Amás, la Conseyería d’Agroganadería y Recursos Autóctnos “nun sólo nun ellaboró’l programa añal d’actuaciones, sinón que lleva dos años ensin convocar al Comité Consultivo del Llobu”.
 
Los grupos que sofiten esti recursu d’apelación no gubernativu presentáu güei contra resolución firmada’l 1 d’agostu son l’Asociación para la Defensa Jurídica del Medio Ambiente ‘ULEX’, la Coordinadora Ecoloxista d’Asturies, l’Asociación para la Conservación y Estudio del Lobo (ASCEL), la Plataforma por la Defensa de la Cordillera Cantábrica, l’Observatorio Justicia y Defensa Animal, l’Asociación Verdes Asturianos, l’Asociación Nacional Animales con Derechos y Libertad (ANADEL), SOS Cuideiru y el Colectivo Ecologista de Avilés.