Greenpeace esixe que Río Narcea Gold Mines faiga llabor de descontaminación

La organización ecoloxista internacional Greenpeace fizo ayeri un llamáu a la empresa Río Narcea Gold Mines pidiéndo-y la recuperación afechisca de les mines que lleva esplotando n'Asturies dende mediaos de los 90 y que dio anuncia de que va trancar esti añu.

Greenpeace píde-y tamién al Gobiernu asturianu que dea a valir la so responsabilidá nel asuntu y diz qu'asturies "nun pue permitise que se repitan casos como los d'Aznalcóllar, onde la rotura d'un banzáu supunxo un desastre mediuambiental".

La organización, que yá esti mes d'avientu denunciare los vertíos de la empresa al Ríu Narcea a l'altura de la planta de Carl.lés (Salas), califica de bona noticia pal mediuambiente'l pieslle de les mines d'oru asturianes y denuncia "los vertíos tóxicos que se ficieron de contino al mediu ambiente, el volume de tierra que se movió y los banzaos "nos qu'hai millones de tonelaes de residuos mineros contaminantes que suponen una amenaza grave pal futuru y que la empresa que s'arriqueció con estes actividaes ha recuperar".

Los niveles d'arsénicu nos banzaos, que perpasen 6 vegaes el tope llegal son el contaminante más peligrosu qu'atalanta Greenpeace que va haber que xestionar énte'l pieslle de les mines, ello ensin escaecer el cianuru y los metales pesaos, polo que Greenpeace esixe una descontaminación seria del llugar entamada pola empresa y supervisada pol Gobiernu asturianu.